رووداو - باکۆ
بە گومانی ھەبوونی پاکێجێکی گوماناوی لە ناوچەی ناڵپەچە لە نزیک ناوەندی شاری باکۆی پایتەختی ئازەربایجان، ھێزێکی زۆر ئەمنی بڵاوی پێکرا و پاکێجە گوماناوییەکەیان ھەڵگرتەوە.
هێزە ئەمنییەکان بۆ ماوەیەک شەقامەکانی ناوچەکەیان داخست. تیمی رووداو لە باکۆ قسەیان لەگەڵ تیمەکانی هێزە ئەمنییەکان و شایەتحاڵان کردووە، گومان دەکەن پاکێجەکە بۆمبی چێندراو بێت.
پاکێجەکە بە ستوونێکی بەستنەوەی سکووتەرێکی کارەباییەوە لکێندرابوو، تیمی پسپۆڕی هەڵگرتنەوەی بۆمب و پۆلیس، پاکێجەکەیان هەڵگرتەوە و رایانگەیاند، لێکۆڵینەوەیان لە رووداوەکە دەستپێکردووە.
دوای بڵاوکردنەوەی هەواڵەکە، وەزارەتی ناوخۆی ئازەربایجان لە وەڵامی رووداودا ئاماژەی بەوە کرد، ئەو پاکێجەی لە قەراخی شۆستەیەک دانرابوو، خاوەندارێتییەکەی بۆ کۆمپانیایەکی دابینکردنی خۆراک دەگەڕێتەوە بەبێ ئەوەی زانیاری لەبارەی ئەوە بدات چی لەنێو پاکێجەکەدا بووە.
بڕیارە رۆژی دووشەممە، 11ـی تشرینی دووەمی 2024، لووتکەی گۆڕانی کەشوھەوا ناسراو بە COP29 لە باکۆ بەڕێوەبچێت و تاوەکو 22ـی مانگ بەردەوام بێت.
هێزەکانی پۆلیس لە باکۆی ئازەربایجان هەواڵیان پێدەگات کە بۆمبێکی چێندراو هەیە، دەگەنە شوێنەکە و بۆمبەکە هەڵدەگرنەوە
ئەم ساڵ کۆڕبەندی Cop29ی تایبەت بە گۆڕانی کەشوهەوا لە باکۆ بەڕێوەدەچێت
ڤیدیۆ: سەنگەر عەبدولڕەحمان#COP29Azerbaijan #Baku pic.twitter.com/Vujp7m15ho— Rudaw (@Rudawkurdish) November 10, 2024
چاوەڕێ دەکرێت ئەم ساڵ زیاتر لە 200 سەرکردە و سەرۆکوەزیرانی وڵاتان بەشداریی لووتکەکە بکەن، ئەمە جگە لە ئامادەبوونی نوێنەرانی زیاتر لە 1600 نوێنەرانی رێکخراوە نێودەوڵەتییەکان.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ