رووداو دیجیتاڵ
رۆژی پێنجشەممە، وەزارەتی گەنجینەی ئەمریکا ناوی 7 هاووڵاتیی ئێرانی و 13 دامەزراوەی دیکەی پەیوەندیدار بە ئێرانی خستە لیستی سزاکانییەوە، بەهۆی ئەو رۆڵەی لە پەرەپێدانی تۆڕە دارایی و تەکنەلۆجییەکانی تاراندا هەیانبووە.
بەگوێرەی راگەیێندراوێکی نووسینگەی کۆنترۆڵکردنی سەروەت و سامانی بیانیی وەزارەتی گەنجینەی ئەمریکا، زۆربەی ئەو کەسانەی سزادراون، پەیوەندییان بە بانکی "کوروش ئۆفشۆر" و کۆمپانیای "سیستمی ئاڵوگۆڕی RUNC"ەوە هەبووە، کە ناوی ئەوانیش لە لیستە نوێیەکەدا هاتووە.
وەزارەتی گەنجینەی ئەمریکا بانکەکەی وەک دامەزراوەیەکی دارایی ناساندووە کە بارەگای سەرەکیی لە تارانە و تۆمەتباری کردووە بە ئاسانکاریکردن بۆ ئەو مامەڵانەی کە پشتگیری لە چالاکییەکانی ئێران بۆ "تێکدانی سەقامگیریی" دەکەن.
ئەمریکا ئەو کۆمپانیایانەشی کردووەتە ئامانج کە پەیوەندییان بە کۆمپانیای "پاسارگاد ئاریان بۆ تەکنەلۆژیای زانیاری و گەیاندن"ـەوە هەیە، کە کۆمپانیایەکی گەورەی بواری تەکنەلۆجیایە و سەر بە بانکی پەسارگادی ئێرانە.
وەزارەتی گەنجینەی ئەمریکا هەروەها سزای بەسەر کۆمپانیای سۆفتوێری "قەشەم ئاریان داتیس"، کۆمپانیای "رەشید سامانە بۆ پرۆسێسکردنی ئەلکترۆنی" و "بەرید فەناڤەر ئاریان"ـدا سەپاندووە و ئاماژەی بە رۆڵیان لە بەهێزکردنی ژێرخانی چاودێری و بانکیی ئێراندا کردووە.
پێشتر، وەزارەتی گەنجینەی ئەمریکا سزای بەسەر پێنج دامەزراوە و کەسێکدا سەپاندبوو کە تۆمەتبارن بە هاوکاریکردنی کۆمپانیای پیشەسازیی دروستکردنی فڕۆکەی ئێران (هیسا)، کە بەشدارە لە بەرهەمهێنانی فڕۆکەی سەربازی و پڕۆگرامی نهێنیی درۆنی "ئەبابیل".
