رووداو دیجیتاڵ
ئانو سارێلا، باڵیۆزی فینلاند لە عێراق، دوای کۆبوونەوەی لەگەڵ تۆڕی میدیایی رووداو، ستایشی کاری رۆژنامەڤانیی رووداوی کرد و بە "پیشەگەریی ئاستبەرز" ناوی برد.
رۆژی پێنجشەممە، سێی تەممووزی 2025، عەلی سەرباز جاف، بەڕێوەبەری پەیوەندییە گشتییەکانی رووداو، لە هەژماری تایبەتیی خۆی لە تۆڕی کۆمەڵایەتیی ئێکس، وێنەیەکی لەگەڵ باڵیۆزی فینلاند بڵاوکردەوە و نووسی: "خۆشحاڵ بووین بە پێشوازیکردن لە باڵیۆز ئانو سارێلا، باڵیۆزی فینلاند لە عێراق. رۆڵی بەڕێزیان لە بەهێزکردنی پەیوەندییەکانی نێوان فینلاند و عێراق و هەرێمی کوردستان بەرز دەنرخێنین. هیوای سەرکەوتنی بەردەوامی بۆ دەخوازین لە داهاتوودا."
ئانو سارێلا، تویتەکەی بڵاوکردەوە و نووسی: "گەرمترین سوپاس بۆ تۆ و رووداو، بۆ ئەو کۆبوونەوە سوودبەخشە، بۆ ئەو رۆژنامەڤانییە پیشەگەرییە ئاستبەرزەی کە پێشکێشی دەکەن، جێگەی رێزێکی زۆرە."
باڵیۆزی فینلاند لە کۆتایی بڵاوکراوەکەی هاشتاگی #PressFreedom (ئازادیی رۆژنامەگەری)ـی بەکارهێنا.
سارێلا دیپلۆمات و پارێزەرە، لەدایکبووی 1958ـە و لە 23-03-2023ـەوە وەکو باڵیۆزی فینلاند لە عێراق دەستبەکاربووە.
سارێلا پێش هاتنی بۆ عێراق، لە هەریەک لە بەرلین، تۆکیۆ، ستۆکهۆڵم، واشنتن و لاگۆس (نایجیریا) ئەرکی دیپلۆماسی هەبووە.
