جیهان
باڵیۆزی ئەمریکا لە نەتەوە یەکگرتووەکان ئەمڕۆ لەکاتی قسەکردن لە ئەنجوومەنی ئاسایش، وێنە: Bryan R. SMITH / AFP
رووداو دیجیتاڵ
باڵێۆزی ئەمریکا لە نەتەوە یەکگرتووەکان دەڵێت، ئەو هێرشەی سوپای پاسداران کردییە سەر ئیسرائیل، بۆ بەرگری لە ئێران نەبووە و لە هێرشەکەشدا شکستی هێناوە.
رۆژی چوارشەممە 02-10-2024 لیندا تۆماس گرینفیڵد، باڵیۆزی ئەمریکا لە نەتەوە یەکگرتووەکان، لە کۆبوونەوەیەکی بەپەلەی ئەنجوومەنی ئاسایشی رێکخراوەکە سەرکۆنەی هێرشە مووشەکییەکەی ئێرانی بۆ سەر ئیسرائیل کرد و، گوتی "ئێران بۆ بەرگری لەخۆکردن ئەو هێرشەی نەکرد."
لە دانیشتنەکەدا هەریەک لە ئەنتۆنیۆ گوتیرێز، سکرتێری گشتیی نەتەوە یەکگرتووەکان و نوێنەرانی ئێران، سووریا، عێراق، ئیسرائیل و لوبنان ئامادەبوون. گرینفیڵد گوتی "خۆشبەختانە، بە هاوئاهەنگییەکی نزیکی نێوان ئیسرائیل و ئەمریکا، ئێران شکستی هێنا لەوەی ئامانجەکانی بپێکێت، کە ویستبووی وێرانکارییەکی گەورە بنێتەوە."
دوێنێ (سێشەممە) سوپای پاسدارانی ئێران رایگەیاند، لە تۆڵەی کوژرانی ئیسماعیل هەنییە، سەرۆکی پێشووی مەکتەبی سیاسیی حەماس و حەسەن نەسروڵڵا، ئەمینداری گشتیی حیزبوڵڵا هێرشێکی مووشەکییان کردووەتە سەر ئیسرائیل.
دواتر سوپای ئیسرائیل رایگەیاند، نزیکەی 180 مووشەکی بالیستی ئاراستەکراون و بەشێکی زۆریان بەرپەرچ دراونەتەوە.
خانمە باڵیۆزەکەی ئەمریکا دووپاتیکردەوە "ئەوەی ئێران کردی بەرگری لەخۆکردن نەبوو." هەروەها گوتی "سوپای پاسدارانی ئێران، لەو هێرشە مەبەستی ئەوە نەبوو وڵاتەکەی لە هەڕەشەی وڵاتێک بپارێزێت، بەڵکو هاوشانی حیزبوڵڵا وەستان، بەتایبەت لە دوای کوژرانی نەسروڵڵا، کە رابەرایەتیی گرووپێکی تیرۆریستیی دەکرد و دەستی بە خوێنی هەزاران ئەمریکی، لوبنانی و ئیسرائیلی سوور بوو."
دوای هێرشەکە، بنیامین نەتەنیاهوو، سەرۆکوەزیرانی ئیسرائیل لە کۆبوونەوەیەکی کابینەکەیدا گوتی "ئێران ئەمشەو هەڵەیەکی گەورەی کرد و باجەکەیشی دەدات. هەرکەس هێرشمان بکاتە سەر، هێرش دەکەینەوە سەری."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ