ئەردۆغان بۆ بەرەنگاربوونەوەی پەکەکە داوای هاوکاری لە وڵاتان دەکات

 

 

سەرۆککۆماری تورکیا لە گوتارەکەیدا پێداگریی وڵاتەکەی لە بەرەنگاربوونەوەی پەکەکە، یەپەگە، داعش، جەماعەتی گولەنییەکان نیشاندا و گوتی: "سەرچاوەکەیان هەر کوێ و هەر کێ بن، بەردەوامدەبین لە بەرەنگاربوونەوەی پەکەکە، یەپەگە، فەتۆ و داعش. دەمەوێ دووپاتی بکەمەوە، لە بابەتی وشککردنی سەرچاوەی دارایی رێکخراوەکانی تیرۆرستی چاوەڕێی هاوکاریی بەهێز لە تەواوی دۆستانمان دەکەین".

 

لە کاتێکدا تورکیا لە رۆژئاڤای کوردستان رووبەڕووی یەپەگە و لە باکوور و باشووریش رووبەڕووی پەکەکە دەبێتەوە، ئەردۆغان گوتی:"لە پاککردنەوەی سووریا و باکووری عێراق لە تیرۆر بێ سڵکردنەوە، هەنگاو دەنێین. هەتا ئەو کاتەی تیرۆر هەڕەشە بێت لەسەر وڵات و ناوچەکەمان و جیهان، بەردەوامدەبین لە هەنگاوەکانمان. بەرەنگاری هەموو رێکخراوەکانی تیرۆرستی دەبینەوە".

 

ئەم قسانەی سەرۆککۆماری تورکیا لەکاتێکدایە بەرەبەیانی دووشەممە 18-4-2022 تورکیا ئۆپەراسیۆنێکی نوێی سەربازیی بەناوی چڕنووک- قفڵ لە دژی گەریلاکانی پارتی کرێکارانی کوردستان (پەکەکە) لە هەرێمی کوردستان دەستپێکرد.

 

بەشێکی دیکەی گوتارەکەی ئەردۆغان تایبەت بوو بە رووسیا و ئۆکراینا کە هێشتا شەڕی نێوانیان بەردەوامە، ئەردۆغان گوتی:" لایه‌نه‌كان به‌ره‌وپێشچوونی به‌رجه‌سته‌یان هه‌بوو، به‌ڵام دیمه‌نه‌كانی بوچا و ئیرپین، به‌ئامانج گرتنی سڤیله‌كان له‌ كراماتۆرسك، هه‌وڵه‌كانی په‌كخستین. سه‌ره‌تا ئاگربه‌ست و دواتر بنیاتنانی ئاشتیی هه‌میشه‌یی له‌نێوان دوو دراوسێماندا، یه‌كێك ده‌بێت له‌ باشترین كاره‌كان له‌پێناو مرۆڤایه‌تیدا. به‌رده‌وامده‌بین له‌ هه‌وڵه‌كانمان بۆ ده‌ستخستنی ئه‌و ئه‌نجامه‌ی لایه‌نه‌كان و كۆمه‌ڵگه‌ی نێوده‌وڵه‌تی رەزامەندن".

 

ئه‌ردۆغان هەروەها رایگەیاند باوەڕی به‌وه‌ هه‌یه‌ كه‌ ده‌كرێت چاره‌سه‌رێكی ئاشتییانه‌ له‌رێی دیالۆگەوە له‌سه‌ر بنه‌مای پاراستنی سه‌روه‌ری و یه‌كپارچه‌یی خاكی ئۆكراینا، بدۆزرێته‌وه.