رووداو دیجتیتاڵ
لە چوارەمین کۆنگرەی ئیی پارتیدا موساڤات دەرڤیشئۆغڵو بە سەرۆکی پارتەکە هەڵبژێردرایەوە.
کۆنگرەکەی ئیی پارتی ئەمڕۆ یەکشەممە 18-1-2026 لە ئەنقەرە بەڕێوەچوو. دەرڤیشئۆغڵو تاکە بەربژێری پۆستی سەرۆکی پارتەکە بوو و ئەندامانی سەرکردایەتیی ئیی پارتی دەنگیان پێدا.
تەواوی هەزار و 180 ئەندامی رێپێدراو کە دەتوانن دەنگ بۆ هەڵبژاردنی سەرۆک بدەن، دەنگیان بۆ دووبارە هەڵبژاردنی دەرڤیشئۆگڵو بە سەرۆک دا و جارێکی دیکە لە سەر کورسیی سەرۆکی ئیی پارتی دادەنیشێتەوە.
دوای ئەوەی مەرال ئاکشەنەر، سەرۆک و دامەزرێنەری ئیی پارتی دەستی لەکار کێشایەوە، رۆژی 27-4-2024 ئیی پارتی پێنجەمین کۆنگرەی نائاسایی بەست و موساڤات دەرڤیشئۆغڵو بە سەرۆکی پارتەکە هەڵبژێردرا.
موساڤات دەرڤیشئۆغڵو کێیە؟
- 1960 لە ئەنقەرە لەدایکبووە
- بەشی کارگێڕیی کاری لە کۆلێژی زانستە کارگێڕی و ئابوورییەکانی زانکۆی غازی تەواوکردووە
- ساڵانی 90کان لە زۆر کۆمپانیادا بەڕێوەبەر بووە
- 2000 سەرۆکی رێکخستنەکانی پارتی بزووتنەوەی نەتەوەیی (مەهەپە) بووە لە ئیزمیر
- 2009 بووەتە بەربژێری مەهەپە بۆ سەرۆکی گەورەشارەوانیی ئیزمیر، بەڵام شکستی هێناوە
- 2012 بووەتە بەربژێر بۆ سەرۆکایەتیی مەهەپە بەڵام شکستی هێناوە
- 2017 دەستی لە مەهەپە کێشایەوە و پەیوەندیی بە ئیی پارتی کرد
- 2018 بە پەرلەمانتاری ئیی پارتی هەڵبژێردرا
- بووە یاریدەدەری سەرۆکی ئیی پارتی بۆ کاروباری هەڵبژاردنی شارەوانی
- 2024 بە سەرۆکی ئیی پارتی هەڵبژێردرا
- خێزاندارە و باوکی کچێکە بە ناوی زەینەب
.jpg&w=3840&q=75)