رووداو دیجیتاڵ
وەزیری دارایی سووریا بە رووداوی گوت، پەیوەندییەکانیان لەگەڵ ئەمریکا "رۆژ بە رۆژ باشتر دەبێت" و گەشبینن بە گەڕانەوەی کۆمپانیا و بانکە ئەمریکییەکان بۆ وڵاتەکەیان. هەروەها گوتی، "پشتیوانیی سیاسی"ـیان هەیە بۆ وەرگرتنەوەی متمانەی دامەزراوە داراییە نێودەوڵەتییەکان.
چوارشەممە 15-10-2025 محەممەد یەسر بەرنییە، وەزیری دارایی سووریا، بە دیار کوردە، بەڕێوەبەری نووسینگەی رووداوی لە واشنتن، راگەیاند: "پێموایە رۆژ بە رۆژ پەیوەندیمان لەگەڵ ئەمریکا باشتر دەبێت، ئێمە هەوڵ دەدەین ئەوە پیشان بدەین کە هاوبەشێکی جیدین و پرۆگرامێکی چاکسازیی جیدیمان هەیە."
بەرنییە ئاماژەی بەوەدا، لە نزیکەوە کار لەگەڵ ئەمریکییەکان دەکەن بۆ ئەوەی پیشانیان بدەن دارایی گشتیی خۆیان رێکخستووە و چاکسازیی زۆر دەکەن بۆ پێشخستنی کەرتی دارایی. ئەو گوتی: "ئێمە بە پەیوەندیی سووریا-ئەمریکا زۆر گەشبینین."
وەزیری دارایی سووریا ئاشکرای کرد، چاوەڕێی هاتنی کۆمپانیای زیاتری ئەمریکین و گوتی: "لە چەند هەفتەی رابردوو لەگەڵ چەندین رێکخراوی ئەمریکی کۆبوونەوەمان هەبووە. بەیانی لەگەڵ [بانکی] ڤیزا کۆبوونەوەمان هەیە و لەگەڵ زۆربەی بانکەکان لە گفتوگۆی چڕوپڕداین."
سەبارەت بە چۆنیەتی وەرگرتنەوەی متمانەی سندووقی نێودەوڵەتیی دراو و بانکی نێودەوڵەتی، بەرنییە گوتی، ئەمە لە رێگەی بەڕێوەبردنی دارایی "بە رێکخستن و سیاسەتێکی بەرزەوە، بە بەرەنگاربوونەوەی گەندەڵی، بە یاسا و رێسای نوێ و بە شەفافیەت" دەبێت.
بەرنییە جەختیکردەوە: "رێکخراوە نێودەوڵەتییەکانیش پێویستییان بە پشتیوانیی سیاسی هەیە، کاتێک پشتیوانیی سیاسی هەبێت، ئەوانیش کارت لەگەڵدا دەکەن،" و دووپاتیکردەوە کە ئەوان ئەو پشتیوانییەیان هەیە.
لەبارەی وەرگرتنی قەرزی نوێوە، وەزیری دارایی سووریا گوتی: "ئێمە خواستی وەرگرتنی پارە [قەرز]ـمان نییە، سەرنجمان لەسەر ئەوەیە رێکخراو بین. ئێمە دەمانەوێت لەوە دڵنیابینەوە کە ناوماڵی خۆمان رێکخراوە. لەوانەیە تەنیا بۆ پرۆژەی ستراتیژی قەرز وەرگرین، ئەو کاتەی کە کەرتی تایبەت نایەوێت پرۆژەکە وەربگرێت."
.jpg&w=3840&q=75)
.jpg&w=3840&q=75)
