رووداو دیجیتاڵ
وەزارەتی ناوخۆی عێراق دەستگیرکردنی کەسێکی راگەیاند کە "تۆمەتبارە بە هاندان بۆ گردبوونەوە لەبەردەم باڵیۆزخانەی سووریا لە بەغدا."
ئەمڕۆ هەینی، 14ـی ئاداری 2025، وەزارەتی ناوخۆی عێراق بڵاویکردەوە: "بەگوێرەی زانیارییە هەواڵگرییەکان و بە رەزامەندی دادوەر، هێزەکانی هەواڵگری و بەرەنگاربوونەوەی تیرۆری رەسافە، توانییان تۆمەتبارێک دەستگیربکەن کە هەستاوە بە هاندانی خەڵکی بۆ گردبوونەوە و ئاژاوەگێڕی لە بەردەم باڵیۆزخانەی سووریا لە ناوچەی مەنسووری بەغدا."
وەزارەتی ناوخۆی عێراق ئاماژە بەوەش دەکات، تۆمەتبار رێکاری یاسایی پێویستی بەرامبەر دەگیرێتەبەر و هۆشداریش دەدات "لە هەر هەوڵێک بۆ دروستکردنی دووبەرەکی و دەستدرێژیکردنەسەر میوانانی عێراق. دەزگا تایبەتمەندەکانیش بە تووندی مامەڵە لەگەڵ هەر کەسێک دەکەن کە بیەوێت ئاسایشی وڵات تێکبدات."
دوای رووداوەکانی ئەم دواییانەی سووریا، ژمارەیەک هاووڵاتیی سووریایی نیشتەجێی عێراق رووبەڕووی پەلاماردان بوونەوە.
هێزێکی زۆری ئەمنیش لە نزیک باڵیۆزخانەی سووریا لە بەغدا بڵاوکراوەتەوە بۆ رێگریکردن لە ئەگەری خۆپێشاندان و هەڵکوتانە سەر باڵیۆزخانەکە.
