رووداو دیجیتاڵ
محەممەد شیاع سوودانی لەگەڵ نوێنەرانی ناوچەی تەی بەغدا کۆبووەوە و بەڵێنی دا بە دروستکردنی قوتابخانە و دابینکردنی خزمەتگوزاری بۆ ناوچەکە.
ئەمڕۆ شەممە، 8ـی شوباتی 2025، نووسینگەی سەرۆکوەزیرانی عێراق لە راگەیێندراوێکدا گوتی: "ئەمڕۆ محەممەد شیاع سوودانی، سەرۆکوەزیرانی عێراق پێشوازی لە نوێنەرانی ناوچەی تەی لە باکووری شاری کازمییەی بەغدا کرد".
نووسینگەی سەرۆکوەزیرانی عێراق ئاماژە بەوە دەکات کە "محەممەد شیاع سوودانی گوێی لە داواکارییەکانی خەڵکی ناوچەکە گرتووە، بەتایبەتی ئەو کەموکورتییانەی لە رووی خزمەتگوزارییەوە هەن، لەگەڵ داواکارییە پێویستەکانی ژیانی خەڵکەکە؛ هەروەها دابینکردنی باڵەخانەی قوتابخانە بۆ چارەسەرکردنی کێشەی دوو دەوامی و سێ دەوامی."
سەرۆکوەزیرانی عێراق لە کۆبوونەوەکەدا فەرمانی کردووە بە ئامادەکاری بۆ دەستپێکردنی پڕۆژەی دروستکردنی قوتابخانە، هەروەها لایەنە بەرپرسەکانی راسپاردووە بۆ پێداچوونەوە بە دۆخی خزمەتگوزاریی تەندروستی، دەستنیشانکردنی کەموکوڕییەکانی ژێرخانی ناوچەکە.
