رووداو دیجیتاڵ
هاوکات لەگەڵ بەردەوامیی گرژییەکان و دوای کەمتر لە 24 کاژێر لە هێرشی بەرفراوانی ئەمریکا بۆ سەر دامەزراوە ئەتۆمییەکانی ئێران، دۆناڵد ترەمپ، سەرۆکی ئەمریکا لە پۆستێکدا بە ئاشکرا باسی "گۆڕینی رژێم"ـی لە ئێران کرد.
دۆناڵد ترەمپ لە پۆستێکدا لە پلاتفۆرمی Truth Social نووسیویەتی: "لە رووی سیاسییەوە دروست نییە دەستەواژەی 'گۆڕینی رژێم' بەکاربهێنرێت، بەڵام ئەگەر رژێمی ئێستای ئێران نەتوانێت ئێران دووبارە مەزن بکاتەوە، بۆچی گۆڕینی رژێم روونەدات؟".
لە کۆتایی پۆستەکەشیدا نووسیویەتی: "!!!MIGA" کە کورتکراوەی دروشمی "ئێران دووبارە مەزن بکەرەوە"یە و هاوشێوەی دروشمی هەڵبژاردنی خۆیەتی (MAGA - Make America Great Again).
ئەم پۆستەی ترەمپ لە کاتێکدایە کە بەرپرسانی باڵای ئیدارەکەی لە چەند کاژێری رابردوودا بەردەوام جەختیان لەوە دەکردەوە کە ئامانجی هێرشەکانی ئەمریکا تەنیا بەرنامە ئەتۆمییەکەی ئێرانە، نەک گۆڕینی دەسەڵات.
پیت هێگسەس، وەزیری بەرگریی ئەمریکا رۆژی یەکشەممە رایگەیاند، ئۆپەراسیۆنەکە "هێزە ئێرانییەکان و خەڵکی ئێرانی نەکردە ئامانج" و ئامانج لێی گۆڕینی رژێم نییە.
جەی دی ڤانس، جێگری سەرۆکی ئەمریکا لە هەڤپەیڤینێکی تەلەڤزیۆنیدا گوتی: "ئێمە لەگەڵ ئێران لە جەنگدا نین، ئێمە لەگەڵ بەرنامە ئەتۆمییەکەی ئێران لە جەنگداین".
