رووداو دیجیتاڵ
ئاژانسی چالاکڤانانی مافی مرۆڤی ئێران دەڵێت، تاوەکو کۆتایی رۆژی 20ـەمی خۆپێشاندان و ناڕەزاییەکان لە وڵاتەکە، لانیکەم کوژرانی 3090 کەس پشتڕاست کراوەتەوە و بەدواداچوون بۆ پشتڕاستکردنەوەی کوژرانی زیاتر لە 3800 کەسی دیکەش دەکرێت.
ئەمڕۆ شەممە 17-01-2026 ئاژانسی چالاکڤانانی مافی مرۆڤی ئێران (هرانا) نوێترین ئاماری سەبارەت بە کوژران، برینداربوون و دەستگیرکرانی خۆپێشاندەرانی ئێران و رۆژهەڵاتی کوردستان راگەیاند.
بەگوێرەی ئامارەکە، لە سەرەتای ناڕەزاییەکانەوە تاوەکو دوێنێ هەینی، کوژرانی لانیکەم 3090 کەس پشتڕاست کراوەتەوە، کە 19ـیان منداڵن و 165ـیان هێزی ئەمنین.
هاوکات هرانا ئاماژەی بەوەش کردووە، جیا لەو ژمارەیە، بەدواداچوون بۆ پشتڕاستکردنەوەی کوژرانی 3882 کەسی دیکە دەکرێت.
ئاژانسی چالاکڤانانی مافی مرۆڤی ئێران ژمارەی بریندارانی خۆپێشاندانەکانی بەرچاو راگەیاندووە و دەڵێت، لانیکەم برینی 2055 کەسیان سەختە.
هەر بەگوێرەی ئامارەکە، تاوەکو کۆتایی 20ـەم رۆژی خۆپێشاندانەکان، 22 هەزار و 123 خۆپێشاندەر دەستگیرکراون و دانپێدانانی زۆرەملێی 132ـیان بڵاو کراوەتەوە.
لە 28ـی کانوونی یەکەمی 2025ـوە ناڕەزایی و خۆپێشاندان دژی گرانی و دابەزینی نرخی تمەن لەلایەن کاسبکارانی تارانەوە دەستیپێکرد و دواتر سەرجەم پارێزگاکانی ئێرانی گرتەوە و لە زۆربەی شارەکاندا گرژی تێکەوت.
تاوەکو ئێستا بەرپرسانی ئێرانی بە فەرمی ژمارەی قوربانییانی رانەگەیاندووە، بەڵام رەتی ناکەنەوە خەڵکێکی زۆر کوژرابن و دەڵێن، ''بەکرێگیراوانی بیانی، تیرۆریست و سیخوڕانی دوژمن'' خزاونەتە نێو خۆپێشاندەران، خەڵک و هێزە ئەمنییەکان دەکوژن بۆ ئەوەی رای گشتی بەرامبەر دەسەڵاتی ئێران بەلاڕێدا ببەن.
.webp&w=3840&q=75)
