رووداو دیجیتاڵ
تیمێکی تۆڕی میدیایی رووداو چووە گوندی بێت جن لە باشووری سووریا، تەنیا چەند کاژێرێک دوای ئەوەی هێزێکی ئیسرائیل ئۆپەراسیۆنێکی لەنێو گوندەکەدا کرد کە بەهۆیەوە 13 کەس کوژران و زیاتر لە 20ـی دیکەش بریندار بوون. پەیامنێری رووداو لەگەڵ شایەتحاڵانی رووداوەکە قسەی کرد کە باسیان لە "شەوێکی پڕ لە ترس و تۆقاندن" و هێرشی "فڕۆکە، گوللـەتۆپ و مووشەک" کرد.
بەرەبەیانی رۆژی هەینی، 28-11-2025 هێزێکی ئیسرائیلی چوونە ناو گوندی بێت جن لە نزیک سنووری نێوان سووریا و ئیسرائیل، کە بە گوتەی خۆیان ئامانجیان "دەستگیرکردنی ژمارەیەک چەکدار" بوو، بەڵام ئۆپەراسیۆنەکە بووە هۆی پێکدادانێکی سێ کاژێری و بۆردوومانێکی قورس.
ڤیڤیان فەتاح، پەیامنێری رووداو لە دیمەشق، چووە گوندەکە. غەزوان محەممەد حەمادی، کە ماڵەکەی وێران بووە و دوو منداڵی بریندار بوون، گوتی، "کاژێر 3 بۆ 4ـی بەرەبەیان بوو، بینیمان فڕۆکە هاتن و دەنگی تەقە بیسترا، دۆخێکی شێواو بوو. من و هاوژین و منداڵەکەم لە ماڵەوە لە خەودا بووین."
محەممەد حەمادی، شایەتحاڵێکی دیکەی رووداوەکە، باسی لە هێرشەکە کرد و گوتی، "فڕۆکە، گوللـەتۆپ، مووشەک، هەموو شتێک بەکارهاتن. لەناکاو ناوچەکە گەمارۆدرا. سێ کەسیان برد. چوونە نێو ماڵەکانیان و بردیانن، بەڵام نازانین کێن."
هاووڵاتییەکی دیکەی گوندەکە کە نەیویست ناوی ئاشکرا بکرێت، بە رووداوی گوت، "بیانوویان ئەوە بوو کە حەماس و حیزبوڵڵا لێرەن، بەڵام هیچ کەسێک لێرە نییە."
ئۆپەراسیۆنەکە بووە هۆی کوژرانی 13 کەس و برینداربوونی زیاتر لە 20 کەس. زیاد محەممەد ئەبو حەمدە، کارمەندێکی وەزارەتی تەندروستی، ئامارەکەی بۆ رووداو پشتڕاستکردەوە و گوتی، "13 کەس شەهید بوون و نزیکەی 20 برینداریش بۆ نەخۆشخانەکانی مواسات و جۆلانی گوێزرانەوە."
لە بەرامبەردا، سوپای ئیسرائیل لە راگەیێندراوێکدا رایگەیاند کە 6 سەربازی لە ئۆپەراسیۆنەکەدا بریندار بوون.
ئۆپەراسیۆنەکە کاردانەوەی تووندی لێکەوتەوە. وەزارەتی دەرەوەی سووریا هێرشەکەی بە "تاوانی جەنگ" ناوبرد و ئیسرائیلی بەوە تۆمەتبار کرد کە "دەیەوێ ناوچەکە ئاگر تێبەربدات."
نەجات روشدی، جێگری نێردەی تایبەتیی نەتەوە یەکگرتووەکان بۆ سووریا، سەرکۆنەی هێرشەکەی کرد و بە "پێشێلکارییەکی گەورە و قبووڵنەکراوی سەروەری و یەکپارچەیی خاکی سووریا" ناوی برد.
ئیسرائیل رایگەیاندووە، ئامانجی ئۆپەراسیۆنەکە چەکدارانی گرووپی ئیسلامیی "جەماعە ئیسلامییە" بووە کە بنکەکەی لە لوبنانە و هاوپەیمانی حەماسە. راگەیێندراوەکەی سوپای ئیسرائیل دەڵێت، "گومانلێکراوەکان لە ناوچەی بێت جن جموجووڵیان دەکرد و پلانیان بۆ هێرشی تیرۆریستی دژی هاووڵاتییانی ئیسرائیل دادەڕشت."
.jpg&w=3840&q=75)
.jpg&w=3840&q=75)
