رووداو دیجیتاڵ
فەرماندەیی ناوەندیی هێزەکانی ئەمریکا (سێنتکۆم) نوێترین ئاماری ئۆپەراسیۆنی "تووڕەیی داستانئاسای" بڵاوکردەوە. بەپێی داتاکان، لە ماوەی یەک مانگی جەنگدا گورزی کوشندە لە ژێرخانی سەربازی و ئەمنیی کۆماری ئیسلامیی ئێران وەشێندراوە و 11 هەزار ئامانج پێکراون.
ئۆپەراسیۆنی تووڕەیی داستان ئاسا لە رۆژی 28ـی شوباتی 2026، کاژێر 1:15ـی بەرەبەیان لەسەر فەرمانی سەرۆکی ویلایەتە یەکگرتووەکانی ئەمریکا دەستی پێکرد. ئامانجی سەرەکیی ئەم هەڵمەتە، هەڵوەشاندنەوەی دەزگە ئەمنییەکانی رژێمی ئێران و لەناوبردنی ئەو شوێنانەیە کە هەڕەشەی دەستبەجێیان هەیە.
بەپێی راگەیێندراوەکەی سێنتکۆم، قەبارەی هێرشەکان بەم شێوەیە بووە:
ئامانجە پێکراوەکان: زیاتر لە 11,000 ئامانج لە ناو خاکی ئێراندا بۆردوومان کراون.
گەشتە جەنگییەکان: زیاتر لە 11,000 جار فڕۆکە جەنگییەکان فڕیون.
زیانە دەریاییەکان: زیاتر لە 150 کەشتی و ژێردەریایی و بەلەمی جەنگیی ئێران تێکشکێندراون یان زیانی قورسیان بەرکەوتووە.
هێزەکانی ئەمریکا لەم ئۆپەراسیۆنەدا سەرنجیان خستووەتە سەر تێکشکاندنی جومگە هەستیارەکانی سوپای ئێران، لەوانە: ناوەندەکانی فەرماندەیی و کۆنتڕۆڵ، بارەگاکان و بنکە هەواڵگرییەکانی سوپای پاسداران، سیستمە بەرگرییە ئاسمانییەکان و سەکۆکانی هاوێشتنی مووشەکی بالیستی، کارگەکانی بەرهەمهێنانی درۆن و مووشەک، لەگەڵ کۆگە ژێرزەمینییەکانی چەک و ژێرخانی پشتگیریی سەربازی و ناوەندەکانی پەیوەندی.
ئەمریکا بەهێزترین و پێشکەوتووترین چەکەکانی خۆی لەم جەنگەدا بەکارهێناوە:
فڕۆکە بۆمبهاوێژە ستراتیژییەکانی بی یەک، بی دووی تارمەیی، بی52. هەروەها فڕۆکە جەنگییەکانی ئێف22، ئێف35، ئێف15 و ئێف16. ئەمە جگە لە کەشتییە فڕۆکەهەڵگرە ئەتۆمییەکان، ژێردەریاییە ئەتۆمییەکان و کەشتییە تێکشکێنەرەکان. لە وشکانییەوە، سیستمە مووشەکییەکانی تاد، پاتریۆت و هیمارس.
.jpg&w=3840&q=75)
