نەبوونی ئاو و کارەبا لە غەززە
رووداو دیجیتاڵ
کەسوکاری قوربانییانی هێرشەکانی سەر کەرتی غەززە لەبەردەم نەخۆشخانەکان مۆبایلەکانیان بارگاوی دەکەن، بەهۆی ئەوەی نزیکەی هەفتەیەکە کەرتی غەززە کارەبای نییە.
رامی ئەبو حوسنی، هاووڵاتیێکی فەلەستینیە، دەڵێ "دۆخەکە زۆر خراپە و بڕوا ناکەی چۆنە. دوایین شوێن بۆ خەڵکەکە، نەخۆشخانەکانە کە هێشتا کارەبایان هەیە تاوەکو مۆبایلەکانیانی تێدا بارگاوی بکەن و لایتی مۆبایلەکانیان بەکاربهێنن و ماڵەکانیان پێ رووناک بکەنەوە."
غەززەییەکان بە دەست نەبوونی ئاویشەوە دەناڵێنن.
ئولفەت مەنسی دەڵێت، بەهۆی بۆردوومانەوە بەشی زۆری ئەندامانی خێزانەکەی و کەسانی نزیکی لەدەستدا و ئێستا لە شوێنێکی دوورەدەستدا دەژی، ناچارە بە گوێدرێژ ئاوی پاک بگوازێتەوە.
ئولفەت مەنسی، هاووڵاتی فەلەستینی گوتی "ئێمە، لە ماڵی مامم خۆمان حەشاردابوو، بەڵام خانووەکە بەسەرماندا داڕما و 37 کەسمان لێ کوژران. هیچ شتێکمان نەما. نەچووینە قوتابخانەکان تاوەکو لەوێ بمێنینەوە، چونکە زۆر قەرباڵخ بوون، پاکوخاوێنیش نەبوون".
لە حەوتی تشرینی یەکەمەوە بۆردوومانی ئیسرائیل بۆ سەر غەززە دەستیپێکردووە و تائێستا زیاتر لە هەزار و 300 باڵەخانەی کەرتەکە وێران بوون یان زیانیان بەرکەوتووە.
11ی تشرینی یەکەم، سوپای ئیسرائیل داوای لە دانیشتووانی باکووری غەززە کرد ناوچەکەیان جێبهێڵن و بەرەو باشوور بڕۆن، ئەوەش وەک ئامادەکارییەک بۆ هێرشی زەوینیی چاوەڕوانکراوی ئیسرائیل بۆ نێو غەززە، کە تائێستا زیاتر لە 423 هەزار کەس لێیەوە ئاوارەبوون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ