رووداو دیجیتاڵ
وەک هەنگاوێک بۆ مانەوە لە پێشەنگی تەکنەلۆژیادا، حکومەتی ئیمارات بڕیاریدا وانەی ژیریی دەستکرد بخاتە نێو سیستمی پەروەردەی باخچەی ساوایان و قوتابخانەکان.
شێخ محەممەد بن راشد ئال مەکتوم، حاکمی دوبەی و سەرۆکوەزیرانی ئیمارات رایگەیاند، خوێندنی وانەی ژیریی دەستکرد لە قوتابخانە حکومییەکاندا، بە باخچەی ساوایانیشەوە، لە ساڵی داهاتووی خوێندنەوە دەستپێدەکات.
ئال مەکتوم لە پۆستێکی تۆڕی کۆمەڵایەتیی ئێکسدا نووسیویەتی: "ئامانجمان ئەوەیە منداڵەکانمان لە رووی تەکنیکییەوە تێگەیشتنێکی قووڵیان لەبارەی ژیریی دەستکردەوە هەبێت، هاوکات هۆشیاریشیان لەبارەی ئاکارەکانی ئەم تەکنەلۆژیا نوێیەوە زیاد بکەین."
ئەو ئەندامەی بنەماڵەی شاهانەی دوبەی گوتیشی: "بەرپرسیارێتیی ئێمەیە منداڵەکانمان بۆ سەردەمێک ئامادە بکەین کە لە سەردەمی ئێمە ناچێت، بە هەلومەرجێک کە جیاوازە لە هەلومەرجی ئێمە."
ئیمارات کە یەکێکە لە گەورەترین هەناردەکارانی نەوت لە جیهان، بۆ یارمەتیدانی لە فرەسەرچاوەکردنی ئابوورییەکەی و دوورکەوتنەوە لە نەوتی خاو، دەیەوێت پشت بە ژیریی دەستکرد ببەستێت.
ئەم میرنشینەی کەنداو یەکەم وەزارەتی ژیریی دەستکردی لە جیهاندا لە ساڵی 2017 دامەزراند و زانکۆیەکی تایبەت بەم تەکنەلۆژیایەی لە ئەبوزەبیی پایتەخت هەیە.
لە مانگی شوبات، ئیمارات بەڵێنی دا 30 بۆ 50 ملیار یۆرۆ تەرخان بکات بۆ دروستکردنی سەنتەرێکی گەورەی داتای ژیریی دەستکرد لە فەرەنسا.
![سێ رۆژە شەڕ وەستاوە؛ سعودیە درۆنەکانی [گرووپە چەکدارەکانی] عێراق تێکدەشکێنێت](/_next/image?url=https%3A%2F%2Fimages.rudaw.net%2Fimages%2Fasset%2Fnews%2F20260727200030_AFP__20260727__C39X7AF__v1__HighRes__IranUsIsraelWar.jpg&w=3840&q=75)
