رووداو دیجیتاڵ
بەڕێوەبەری گشتیی چاکسازییەکانی هەرێمی کوردستان دەڵێت، بەبۆنەی جەژنی رەمەزانەوە مۆڵەتیان داوەتە 52 سزادراو بۆ ماوەیەک بگەڕێنەوە نێو خێزانەکانیان.
ئیحسان عەبدولڕەحمان بابان، بەڕێوەبەری گشتیی چاکسازییەکانی هەرێمی کوردستان، ئەمڕۆ یەکشەممە بە تۆڕی میدیایی رووداوی گوت: "لەو 52 سزادراوەی مۆڵەت دراون، 24یان لە چاکسازی گەورانی هەولێر، 17 لە چاکسازی گەورانی سلێمانی و 11شیان لە چاکسازی گەورانی دهۆکن".
بەڕێوەبەری گشتیی چاکسازییەکان گوتی، ئەوانەی مۆڵەتەکەیان وەرگرتووە، دەتوانن بۆ ماوەی هەفتەیەک لەنێو کەسوکاریاندا بمێننەوە و دواتر دەگەڕێندرێنەوە بۆ چاکسازییەکان بۆ تەواوکردنی سزاکەیان.
حوکمدراوان لە چاکسازییەکانی هەرێمی کوردستان، سێ مانگ جارێک بۆیان هەیە داوای مۆڵەتی یەک هەفتە دەرچوون لە زیندان بکەن. لەبارەی مەرجەکانەوە بۆ داواکردنی مۆڵەت ئیحسان عەبدولڕەحمان دەڵێت: "ئەو سزادراوەی مافی داواکردنی مۆڵەتی هەیە، دەبێت چارەکێکی حوکمەکەی تەواو کردبێت".
لە هەرێمی کوردستان شەش چاکسازیی هەن؛ دوو لە هەولێر، دوو لە سلێمانی و دووانەکەی دیکەش لە دهۆکن. زیاتر لە پێنج هەزار سزادراو لەنێویاندا سزاکانیان بەسەر دەبەن.
