هەر کاتێک وشەی جوامێر یان پیاوی مەردم دەکەوێتە بەر گوێ، یەكسەر کاک سەڵاحی کوێخام دێتە بەرچاو. کاک سەڵاح نموونەی مەردایەتی و مێرخاسی و پەرۆشی بوو بۆ خاک و نیشتمان. پێشمەرگەیەکی پارتیزان و دڵسۆز، دەوڵەتمەدار و بەرپرسێکی دەست و دامێن پاک و رەوشت بەرز و بە هەموو مانایەک مەرد.
کاک سەڵاح زۆر جیاواز بوو و تا دواساتەکانی ژیانی بە پاکێتی و بەهەمان ئەو بیر و باوەڕەوە ژیا کە لە گەنجێتیدا لەپێناویدا بووە پێشـمەرگە و هەرگیز رێگەی نەدەدا ناو و ناوبانگی لە کەدار بێت.
کاک سەڵاح وەکچۆن لە سەردەمی شاخ و پێشمەرگایەتیدا مەرد و جوامێر بوو، لە قۆناغی پاش پێشمەرگایەتیشدا هەر مەرد و جوامێر مایەوە. نەیهێشت پلە و پۆست ناوی بزڕێنێت. ئەو دەسەڵاتە زۆرەی وەک سەرپەرشتیاری ئیدارەی گەرمیان هەیبوو، بەکاری نەهێنا بۆ بەهێزکردنی پێگەی خۆی یان بۆ پڕکردنی گیرفانی.
لە دوا کۆنگرەی یەکێتی، لەناو گەرمییانییەکاندا رەنگە كاك سەڵاح خۆشەویسترین و بەهێزترین ئەندامی کۆنگرە بووبێت، كەچی پاشەكشەی كرد بۆ هەندێک هەڤاڵی دیکە تا گرژی نەکەوێتە ناو کۆنگرەوە.
لە ژیانمدا لە کەم شت پەشیمانم. بەڵام هەست دەکەم غەدرم لەم پیاوە مەزنە کرد. دوو ساڵ بوو داوای دەکرد خانەنشینی بکەم و هەڤاڵێکی دیکە لە شوێنەکەی دەستبەکار بێت، بەڵام من لێی پاڕامەوە کە لەبەر هەستیاری دۆخەكە و ئەو هاوسەنگیەی رایگرتبوو و هەروەها لەبەر ئەو رێزەی کە لە گەرمیان هەیبوو بەردەوام بێت لە خزمەتکردنی گەرمیان. ساڵی رابردوو بەڵێنم پێدا کە یەکساڵی دیکە بەردەوام بێت خانەنشینی دەکەم. ئەوەبوو سەرەتای مانگی سێپتەمبەری ئەمساڵ خانەنشین کرا.
بەڵێ کوێخا جوامێرەکەی گەرمیان دوو ساڵ تەنیا لەبەر خاتری من و هەستکردن بە بەرپرسیارێتی، ویست و خواستی خۆی و هاوسەرە بەڕێزەکەی مامۆستا هیامی بەلاوەنا و لە پۆستەکەی بەردەوام بوو.
ئێستا پەشیمانم و هەست ئەکەم غەدرم لە خۆی و مامۆستا هیامی هاوسەری کرد کە بە پێداگرییەکانم نەمهێشت لانیکەم دوو ساڵ بە ئارامی و دوور لە فشاری بەرپرسیارێتی پێکەوە بژین. زۆر دڵگرانم کە نەیتوانی یەک رۆژ چێژ لە ژیانی خانەنشینی ببینێت، چونکە هەرکە خانەنشین بوو تووشی پەتای کۆرۆنا بوو. لێرەدا هیچم نییە بیڵێم جگە لەوەی زۆر داوای لێبووردن بکەم لە مامۆستا هیام.
هیوادارم کاک سەڵاح و ئەداکەی نموونەیەک بێت بۆ ئەو کەسانەی نایانەوێت مێژووی خۆیان بە کاری نەشیاو ناشیرین بکەن. ژیان و تێکۆشانی کاک سەڵاح فێرمان دەکات هەر کەسێک کە ئەمڕۆ لەهەر بوارێکدا ناوبانگێکی هەیە، ئەگەر بە پاکی و بە رەوشت بەرزییەوە بژین، ئەوانیش دوای خۆیان وەک کوێخا جوامێرەکەمان بە جوانی دەچنە ناو مێژووەوە.
هەرچەندە وشەکان زۆرجار لە ئاست شكۆ و ناوبانگ و مێژووی مرۆڤە مەزنەکاندا کورت دەهێنن، بەڵام دوای هەموو ئەو ساڵانەی یەکتر ناسینمان هەست دەکەم تەنیا وشەیەک کە شیاو بێت لەپاڵ ناوی کاک سەڵاحدا دایبنێم ئەوەیە کە بڵێم: کاک سەلاحی مەرد.
رۆحت شادبێت کاک سەڵاح.. کوێخاکەی خۆم و گەرمیان
