وێنەیەکی مستەفا فەهمی، قوتابییە کوژراوەکە و ئەو قوتابخانەیەی تێیدا کوژرا
رووداو - دهۆک
چیرۆکی کوژرانی قوتابییەک بە دەستی هاوڕێکەی و لەنێو پۆلدا لە سێمێل، هەمووانی تووشی شۆک کرد. بەپێی بەدواداچوونەکانی رووداو، لە کاتی وانەگوتنەوەدا، قوتابییەک دەمانچەی دەرهێناوە و هاوڕێکەی کوشتووە.
رووداوەکە کاژێر 09:00ـی بەیانی بووە لە قوتابخانەیەکی ئامادەیی قەزای سێمێل لە پارێزگای دهۆک. قوتابییەک لە وانەی عەرەبیدا دەمانچەی لە چانتاکەی دەرهێناوە و هاوپۆلەکەی کوشتووە. کوژراوەکە ناوی مستەفا فەهمییە، دوای رووداوەکە، دۆخێکی ناخۆش و ئاڵۆز لەنێو پۆلدا دروستبووە و قوتابییان و مامۆستا تووشی شۆک بوون.
بکوژ و کوژراو، هاوڕێی یەکدی بوون و هاوپۆلەکانیان باس لەوە دەکەن کە هەردووکیان لە وانەکانیان زیرەک و لێهاتوو بوون و هاوڕێی نزیکی یەکدی بوونە.
قوتابییەکی هاوپۆلیان چیرۆکەکە بۆ رووداو دەگێڕێتەوە و دەڵێت، "سەرەتای وانەی دووەم بوو، هەردووکیان هاوڕێی یەکدی بوون، هەستناکەم پێشتر هیچ لەنێوانیان روویدابێت یان شەڕیان کردبێت. لەنێو پۆلدا دەنگی دەمانچە هات، سەیری دواوەم کرد، بینیم قوتابییەک کەوتووەتە سەر زەوی و ئیدی هەموومان لە پۆلەکە چووینە دەرەوە."
دوای ماوەیەکی کەم لە رووداوەکە، پارێزگاری دهۆک گەیشتە ئەو قوتابخانەیە، بەڵام هیچ قسەیەکی بۆ میدیاکان نەکرد. دوای ئەوە، پۆلیسی دهۆک لە راگەیێندراوێکدا گوتی، قوتابییەک بە دەمانچە هاوپۆلەکەی خۆی کوشتووە کە هەردووکیان لەدایکبووی 2007ـن و دانیشتووی گەڕەکی شەهیدانن. پۆلیس دەڵێت، بکوژەکە دەستگیر کراوە و ئێستا لەژێر لێکۆڵینەوەدایە.
رووداو بەدواداچوونی زیاتری بۆ رووداوەکە کردووە، بەپێی زانیارییەکان، ئەو دوو قوتابییە شەوی رابردوو لە یەکێک لە ساردەمەنییەکان بەیەکەوە بوون و شیرینییان کڕیوە. هاوڕێیەکیان بە رووداوی گوت، کەمێک دەمەقاڵە لەنێوانیان هەبووە، بەڵام چاوەڕوان نەکراوە بگاتە ئەوەی کە یەکێکیان ئەوی دیکە بە دەمانچە بکوژێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ