رووداو دیجیتاڵ
دوای چوار رۆژ لە بێهۆشبوونی، هاونیشتمانییەکی خەڵکی سەنگاو کە وەکو کۆچبەر گەیشتبووە ئیتاڵیا، گیانی لەدەستدا.
هاونیشتمانییەکە ناوی کەیوان فایەق محەممەد، لەدایکبووی ساڵی 1998 و خەڵکی ناحیەی سەنگاوە لە پارێزگای سلێمانی.
رەنج پشدەری، چالاکڤانی کۆچبەری لە ئەورووپا کە چووەتە ئەو نەخۆشخانەیەی کەیوان تێیدا گیانی لەدەستداوە، ئەمڕۆ چوارشەممە بە تۆڕی میدیایی رووداوی گوت، "کەیوان 12ی ئەم مانگە لە توونسەوە گەیشتبووە ئیتاڵیا."
کەیوان فایەق پێش ئەوەی بگاتە ئیتاڵیا، لەنێو بەلەمەکەیان لەنێوان تونس و ئیتاڵیا کەوتووە، پشتەسەری بەر پارچەیەکی بەلەمەکە کەوتووە و بەهۆیەوە بێهۆش بووە.
رەنج پشدەری دەڵێت، "پۆلیسی ئیتاڵیا بە هێلیکۆپتەر کەیوانیان گەیاندووەتە نەخۆشخانەیەک لە شاری پالێرمۆ، دوای نەشتەرگەرییەکی گەورە رایانگەیاند، مێشکی لەکارکەوتووە و ناتوانێت بژی، ئەوەبوو ژیانی لەدەستدا."
تەرمی ئەو گەنجە ئێستا لە دادپزیشکی پالێرمۆیە. برایەک و دوو ئامۆزا و خاڵۆیەکی کە لە ئەورووپا دەژین خۆیان گەیاندووەتە ئیتاڵیا بۆ وەرگرتنەوەی تەرمەکە.
رەنج پشدەری دەڵێت، "باڵیۆزخانەی عێراق لە ئیتاڵیا بەڵێنی هاوکارییان داوە، بەڵام بەهۆی پشوو و رێکارەکانەوە گەڕانەوەی تەرمەکە چەند رۆژێکی دیکەی دەوێت."
لەو بەلەمەی کە کەیوانی تێدا بووە، تەواوی سەرنشینەکانی بە سەلامەتی گەیشتبوونە ئیتاڵیا کە بەشێکی زۆریان کوردبوون.
.jpg&w=3840&q=75)
