فەرەنسا لیژنەی بازرگانیی دەرەکی لە عێراق دادەمەزرێنێت و جەخت لەسەر ژێرخان و وزە دەکاتەوە

ئەمڕۆ دووشەممە، کۆڕبەندی بازرگانیی فەرەنسا و عێراق لە پاریسی پایتەختی فەرەنسا بەڕێوەچوو، کە تێیدا سەرنجی زیاتر خرایە سەر وەبەرهێنان، بازرگانی و رۆڵی فەرەنسا لە عێراق. شاندی باڵای وەزارەتەکانی هەردوو وڵات و شاندێکی حکومەتی هەرێمی کوردستان لە کۆڕبەندەکەدا بەشدارن.

سۆفی سیدۆس ڤیکا، سەرۆکی لیژنەی نیشتمانیی فەرەنسا بۆ راوێژکاریی بازرگانیی دەرەکی بە ئاڵا شاڵی، پەیامنیری رووداوی راگەیاند، پلان هەیە لیژنەیەکی نوێی بازرگانیی فەرەنسی لە عێراق دابمەزرێنن بۆ پەرەپێدانی پەیوەندییە ئابوورییەکانی نێوان هەردوو وڵات.

سیدۆس گوتی، لیژنەکەیان نوێنەرایەتیی پێنج هەزار بەڕێوەبەری جێبەجێکاری کۆمپانیاکانی فەرەنسا دەکات کە لە سەرانسەری جیهان کاردەکەن،" بەڵام گوتیشی: "ئێستا هیچ کەسمان لە عێراق نییە [وەک نوێنەری لیژنە]، بەڵام ژمارەیەکی زۆری کۆمپانیاکانی دیکە هەن کە لە عێراق دەستیان بە هەندێ کار کردووە."

لە وەڵامی پرسیارێکدا سەبارەت بەوەی ئەو کارکردنە چۆن سوود بە هەرێمی کوردستان دەگەیێنێت، سیدۆس رایگەیاند: "شتە باشەکە ئەوەیە، کاتێک کۆمپانیایەکی فەرەنسی دەچێتە وڵاتێکی دیکە، خەڵک لەگەڵ خۆی نابات، تەنیا ستافی کارگێڕی دەبات و خەڵکی ئەو وڵاتە دادەمەزرێنێت، واتە پێویستی زۆریان بە خەڵکی عێراق دەبێت و هەندێ كوردی عێراق لەگەڵ کۆمپانیاکەدا کاردەکەن. واتە ئەوان هەلی کار و بازرگانی دەڕەخسێنن."

سۆفی سیدۆس ڤیکا، سەرۆکی لیژنەی نیشتمانیی فەرەنسا بۆ راوێژکاریی بازرگانیی دەرەکی: بەڵێ، ئەوە پرسیارێکی باشە. ناوم سۆفی سیدۆسە، سەرۆکی لیژنەی نیشتمانیی فەرەنسام بۆ راوێژکاریی بازرگانیی دەرەکی کە نوێنەرایەتیی پێنج هەزار بەڕێوەبەری جێبەجێکاری کۆمپانیاکانی فەرەنسا دەکات کە لە سەرانسەری جیهان، واتە لە 152 وڵات کاردەکەن. ئێمە ئێستا هیچ کەسمان لە عێراق نییە، بەڵام ژمارەیەکی زۆری کۆمپانیاکانی دیکە هەن کە لە عێراق دەستیان بە هەندێ کار کردووە؛ دەمانەوێت روونی بکەینەوە کە کێ بازرگانی دەکات و دێتە نێو دامەزراوەکەمانەوە، دواتر ئەوان لەگەڵ باڵیۆز، وەزیری ئێمەی بازرگانیی دەرەکی و وەزیرەکەتان کاردەکەن. ئەمڕۆ داوایان لێدەکەم حەوت کۆمپانیای فەرەنسی دیاریبکەین بۆ ئەوەی لیژنەیەکیان لێ دروست بکەین تاوەکو بتوانم رایبگەیێنم کە لیژنەیەکی فەرەنسیمان لە عێراق دەبێت. دوای ئەوەی ئەو لیژنەیەمان دروستکرد، ئەوان هەموو مانگێک لەگەڵ باڵیۆز کۆدەبنەوە و باڵیۆز پێیان دەڵێت ئێمە دەتوانین لەنێو عێراق چی بکەین. ئێمە دەتوانین کاری جیاجیا بکەین، بۆ نموونە، ئێمە لە فەرەنسا تۆتاڵ، سوێز و هەموو کۆمپانیایەکی وزە، گاز و نەوتمان هەیە؛ هەروەها کۆمپانیای تایبەمەندمان هەیە لەبواری نەهێشتنی کاربۆن لە کەرتی وزە و کەرتە جیاجیاکانی دیکەدا. ئێمە پێنج هەزار بەڕێوەبەری جێبەجێکاری هەموو گەورە کۆمپانیاکانی فەرەنسامان هەیە. ئەوەی ئێستا دەمانەوێت بیکەین ئەوەیە، بچینە عێراق و لە عێراق کاربکەین، چونکە خەڵک نازانێت ئێستا عێراق چۆنە. ئەمڕۆ زۆر دڵخۆش بووین کە وەزیرەکەتان زۆر بەباشی باسی وڵاتەکەتانی کرد و بەڵێنی دا کە کۆمپانیاکانی فەرەنسا رووبەڕووی هیچ کێشەیەک نەبنەوە و یارمەتیمان دەدات بۆ ئەوەی کۆمپانیاکانمان گەشە بکەن. زۆر کۆمپانیای فەرەنسی کە قسەیان لەگەڵ کردووم، پێیانگوتووم دەیانەوێت بێنە نێو لیژنەکەمان، چونکە ئێوە پشت بە وەزیر دەبەستن و ئێمەش دەمانەوێت لەگەڵ ئێوە بین.

سۆفی سیدۆس ڤیکا، سەرۆکی لیژنەی نیشتمانیی فەرەنسا بۆ راوێژکاریی بازرگانیی دەرەکی: بەڵێ، ئەوە بەندە لەسەر ئەوەی کە عێراق پێویستی بە چییە. ئەمڕۆ عێراق پێویستی زۆری بە ژێرخانە؛ ئێوە زۆر پێویستتان بە ناکاربۆنکردنە، زۆر پێویستتان بە ژێرخانی ئاوە، چونکە گرنگترین شت ئەوەیە ئاوی پاک و باش هەبێت. زۆر کۆمپانیای وەک ڤوێلیا و سوێز هەن کە دەیانەوێت بچنە شوێنەکانی سەرانسەری جیهان و کار بکەن. پێم وایە شتێکی باش دەبێت ئەگەر باڵیۆزێکی فەرەنسی هەبێت، بۆ ئەوەی بڵێت، بەڵی کۆمپانیامان هەیە و دێن کار دەکەن و ئێستا لیژنەی تایبەتمەندمان دروست کردووە. ئێمە وەک لیژنە، بێ بەرامبەر کار دەکەین، هەرچەندە راستە کە کۆمپانیاکان بۆ خۆیان کاردەکەن، بەڵام ئەوەی ئێمە لە لیژنەکەدا دەیکەین، کارێکی بێبەرامبەرە، تەنیا بۆ ئەوەیە تاوەکو بە باڵیۆز بڵێین کە ئێمە دەتوانین چی بکەین، هەروەها بۆ ئەوەیە کە هەموومان پێکەوە بین و پیشانی کۆمپانیاکانی فەرەنسا بدەین کە عێراق وڵاتێکی سەلامەتە. ئەگەر ئێوە پێویستتان بە ژێرخان بێت، ئێمە کۆمپانیای تایبەت بە ژێرخانمان هەیە و بە گوێرەی داواکاریتان هەموو شتێک دابین دەکەن.

سۆفی سیدۆس ڤیکا، سەرۆکی لیژنەی نیشتمانیی فەرەنسا بۆ راوێژکاریی بازرگانیی دەرەکی: شتە باشەکە ئەوەیە، کاتێک کۆمپانیایەکی فەرەنسی دەچێتە وڵاتێکی دیکە، خەڵک لەگەڵ خۆی نابات، تەنیا ستافی کارگێڕی دەبات و خەڵکی ئەو وڵاتە دادەمەزرێنێت، واتە پێویستی زۆریان بە خەڵکی عێراق دەبێت و هەندێ كوردی عێراق لەگەڵ کۆمپانیاکەدا کاردەکەن. واتە ئەوان هەلی کار و بازرگانی دەڕەخسێنن. گرنگترین ئەرکی لیژنەکەمان ئەوەیە کە شتێک بکەین بۆ ئەوەی کۆمپانیاکانی عێراقیش بێنە فەرەنسا و کۆمپانیا فەرەنسییەکانیش بچنە عێراق."