رووداو دیجیتاڵ
پیاوێک لە کەرکووک هێرش دەکاتە سەر خوشکەکەی و بە دەرنافیس هەردوو چاوی دەردەهێنێت؛ پەیامنێری رووداو دەڵێت، ئافرەتەکە هەردوو چاوی لەدەستداوە و فەرمانی دەستگیرکردن بۆ براکەی دەرچووە.
ئەمڕۆ چوارشەممە 26-03-2025 ژنێک گەیێندراوەتە نەخۆشخانەی گشتیی کەرکووک کە لەلایەن براکەیەوە هێرشی کراوەتە سەر و دەگوترێت بە دەرنافیس هەردوو چاوی دەرهێنراوە.
بەپێی زانیارییەکانی هەردی محەممەد، پەیامنێری تۆڕی میدیایی رووداو، ئافرەتەکە ناوی جەمیلە حوسێن کازم، لەدایکبووی ساڵی 1959ـیە و لەگەڵ براکەی تەها حوسێن پێکەوە دەژین.
جەمیلە حوسێن هاوژینەکەی لە ژیاندا نەماوە و منداڵی نییە. وەک هەردی محەممەد گوتی، ''خۆی هۆکاری رووداوەکە بۆ ئەوە دەگەڕێنێتەوە کە براکەی ویستوویەتی زەوییەکی تاپۆ کە هی هەردووکیانە، بفرۆشێت و ئەویش رێگری لێکردووە''.
ئەوە لەکاتێکدایە تەها حوسێن لەبارەی رووداوەکەوە بە کەسوکارەکەی راگەیاندووە، ''پەیوەندی بە زەویی تاپۆوە نییە، بەڵکو بەهۆی کێشەیەکی کۆمەڵایەتی بووە.''
بەگوێرەی زانیارییەکان ئافرەتەکە هەردوو چاوی لەدەستداوە و بڕیارە سبەی نەشتەرگەری بۆ بکرێت. هەروەها فەرمانی دەستگیرکردن بۆ تەها حوسێن دەرچووە، بەڵام تاوەکو ئێستا دەستگیرنەکراوە.
.jpg&w=3840&q=75)
