رووداو دیجیتاڵ
بەهۆى دواکەوتنى ئامادەکارییەکان و کەمى تیمەکان، سەرژمێرى لە چەند گوندێکى ناوچە کوردستانییەکانى پارێزگاى نەینەوا تەواو نەبووە. لە قەزاى شێخان بۆ 900 خێزان یەک بژمێر دانراوە، ئەوە لە کاتێکدا پارێزگارى نەینەوا دەڵێت: "سەرژمێرى خێزانەکان 100% تەواو بووە و تەنیا ناردنی زانیارییەکان ماوە".
ئێوارەى ئەمڕۆ پێنجشەممە، عەبدولقادر دەخیل، پارێزگارى نەینەوا کە هاوکات سەرۆکى لیژنەى باڵاى سەرژمێرىی گشتیى دانیشتووانە لەو پارێزگایە رایگەیاند: 100%ى کارەکانى سەرژمێرى تەواو بوون و تەنیا ناردنى زانیارییەکان ماوە.
لە دوێنێ چوارشەممەوە، سەرژمێرى گشتیی دانیشتووان دەستىپێکردووە کە ماوەکەى دوو رۆژە.
محەممەد کاکەیی، سەرۆکى لیژنەى ئەمنیی ئەنجوومەنى پارێزگاى نەینەوا بە تۆڕى میدیایی رووداوى راگەیاند: "هێشتا سەرژمێرى لە هەندێک لە ناوچەکانى مادەى 140 تەواو نەبوون، بە هۆى ئەوەى درەنگ دەستیان پێکراوە و ئەو گوندانە لە سنوورى خازر، قەزاى شێخان و مەخموورن".
بۆ یەکەمجار لە دواى 37 ساڵ سەرژمێریى گشتیى دانیشتووان لە عێراق و هەرێمى کوردستان پێکەوە دەکرێت، رۆژانى 20 و 21ـى تشرینى دووەم بۆ تۆمارکردنى خێزانەکانە.
سەردار شێخ یەحیا، قایمقامى شێخان بە تۆڕى میدیایی رووداوى گوت: "گلەییمان لە وەزارەتى پلاندانانى فیدراڵى هەیە، ناکرێت یەک کارمەند و تابلێت بۆ تۆمارکردنى 900 خێزان دابنرێت و لە 48 کاژێردا کارەکانى تەواو بکات".
تەواونەبوونى سەرژمێریى دانیشتووان لە ناوچە کوردستانییەکان بەهۆى درەنگ دەستبەکاربوونى تیمەکانەوە بووە.
ئەیاد سلێمان، جێگرى بەڕێوەبەرى ئامارى نەینەوا بە تۆڕى میدیایی رووداوى گوت: "هۆکارى دواکەوتنى سەرژمێرى لە گوندەکانى قەزاى شێخان و ناحیەى فەیدیێ ئەوەیە تیمەکان درەنگ دەستیان بەکار کردووە و بەراورد بە قەزا و ناحیەکانى دیکە هەفتەیەک دواکەوتوون، سبەى و دوو سبەى کارەکان تەواو دەکەن".
.jpg&w=3840&q=75)
