رووداو دیجیتاڵ
سەرۆکى لیژنەى باڵاى جێبەجێکردنى مادەى 140 بە نووسراوى فەرمى جەخت لەسەر بڕیارێک دەکاتەوە کە تایبەتە بە هەڵوەشاندنەوەى گرێبەستە کشتوکاڵییەکانى ئەو هاووڵاتییانەی کەرکووک کە عەرەب نین.
هادى عامرى، سەرۆکى لیژنەى باڵاى جێبەجێکردنى مادەى 140 نووسراوێکى ئاراستەى وەزارەتى کشتوکاڵى عێراق کردووە و تێیدا جەخت لە سەر جێبەجێکردنى بڕیارى ژمارە 29ى ساڵى 2012 دەکاتەوە کە لەلایەن ئەنجوومەنى وەزیرانى ئەو کاتی عێراقەوە دەرکراوە بۆ هەڵوەشاندنەوەى سەرجەم بڕیارەکانى کاروبارى باکوورى سەردەمى دەسەڵاتی بەعس کە تایبەت بوون.
بڕیارەکە جەخت لە هەڵوەشاندنەوەی مافى مامەڵەکردن بە زەوییە کشتوکاڵییەکان لە کەرکووک بۆ ئەو کەسانەی عەرەب نین دەکاتەوە و داوایکردووە، ئەو گرێبەستە کشتوکاڵییانەى واژۆ کراون هەڵبووەشێندرێنەوە و دۆخەکە بگەڕێندرێتەوە بەر لە دەرکردنى ئەو بڕیارانەى حیزبى بەعس.
هادى عامرى لەو نووسراوەدا ئاماژەى بەوە داوە کە ئەو بڕیارەى ئەنجوومەنى وەزیرانى عێراق کارایە و نابێت ئەو گرێبەستانە نوێ بکرێنەوە.
فەهمى بوورهان، بەرپرسی دەستەى ناوچە کوردستانییەکانى دەرەوەى ئیدارەى هەرێمى کوردستان رۆژی دووشەممە، 19-6-2023 لەو بارەوە بە تۆڕى میدیایی رووداوى راگەیاند، ئەو بڕیارە جەختکردنەوەیە لە بڕیارێکى پێشوو بۆ هەڵوەشاندنەوەى ئەو گربەستە کشتوکاڵییانە.
فەهمى بورهان گوتیشی، "دواى ئەو بڕیارەى ساڵى 2012 تەنها 1,200 دۆسیەى ئەو گرێبەستانە یەکلاکرانەوە و نزیکەى چوار هەزار دۆسیە ماون یەکلابکرێنەوە".
لەسەردەمى دەسەڵاتى بەعسدا هەزاران زەوى هاونیشتمانیانى کورد و تورکمان لە کەرکووک داگیرکران، دواى ئەوەى گرێبەستە کشتوکاڵتیەکانیان هەڵوەشێنرانەوە و زۆرینەى ئەو زەویانە بە گرێبەست دراون بە هاووڵاتیانى عەرەب.
