هەڵەیەک روویدا! دووبارە هەوڵبدە
رووداو دیجیتاڵ
بەڕێوەبەری فەرمانگەی ژینگەی هەولێر دەڵێت، به‌هۆی پیسكردنی ژینگه‌ی هه‌ولێر چوار خاوەن موەلیدەی دیکە دراونەتە دادگا.
رۆژی دووشەممە، 17ـی ئاداری 2025، دڵشاد هیرانی، بەڕێوەبەری فەرمانگەی ژینگەی هەولێر بە تۆڕی میدیایی رووداوی راگەیاند، ئەو موەلیدانە لەلایەن لیژنەکانمان ئاگادارکرانەوە 10 بۆ 15 رۆژ مۆڵەتیان پێدرا، دواتر پابەند نەبوون و بە پێبژاردن سزادران و ماوەی مانگێک مۆڵەتیان هەبوو تاوەکو بڕی پێبژاردنەکە بدەن، بەڵام نەیاندا و درانە دادگە.
لەبارەی بڕی پێبژاردنەکە دڵشاد هیرانی گوتی: "لە 500 هەزارەوە دەستپێدەکات تاوەکو دوو ملیۆن."
بە گوتەی بەڕێوەبەری فەرمانگەی ژینگەی هەولێر، لەسەرەتای ئەم ساڵەوە خاوەنەکانی 15 موەلیدە لە هەولێر، کە موەلیدەکانی دووكەڵی زۆر و دەنگی بەرزیان هەبووە و ببوونە هۆی هەراسانکردنی هاووڵاتیان، دراونەتە دادگە.
بەڕێوەبەری فەرمانگەی ژینگەی هەولێر لەبارەی پاڵاوگەکانەوە دەڵێت، ژمارەی پاڵاوگە داخراوەکان لە پارەوە تاوەکو ئێستا گەیشتووەتە 59 پاڵاوگە.
12-01-2025 کۆبوونەوەیەک لە هەولێر بە سەرپەرشتیی مەسرور بارزانی، سەرۆکوەزیرانی هەرێمی کوردستان بەڕێوەچوو.
لە کۆبوونەوەکەدا چوار بڕیار بۆ پاککردنەوەی هەوای شارەکان دران کە ئەمانەن:
یەکەم: هەر پاڵاوگەیەک یان هەر کارگەیەک کە لە دەرەوەی مەرج و رێنماییەکان کاربکات و ببێتە هۆی پیسبوونی ژینگە، رێکاری یاسایی بەرامبەر دەگیرێتەبەر.
دووەم: رێگە لە هەر پاڵاوگەیەک یان هەر کەس و لایەنێک دەگیرێت کە سووتەمەنی پیسی ئوتومبێل بەرهەم دێنێت یان بە قاچاخ دەیهێنێت و زیانی تەندروستی هەیە؛ هەروەها دەبێ سنوورێک بۆ سووتانی گازی هاوەڵ لە کێڵگە نەوتییەکان دابنرێت.
سێیەم: دەبێت خاوەنی موەلیدەکانی کارەبا، پابەندی رێنماییەکانی حکومەت بن و فلتەریان بۆ دەنگ و پیسی هەبێت و هەر کەسێک سەرپێچی بکات، رێکاری یاسایی بەرامبەر دەگیرێتەبەر.
چوارەم: رێگری لە بەکارهێنانی ئاوی پیس و ئاوەڕۆکان بکرێت کە بۆ ئاودانی سەوزە و ئاودێریی بەکاردەهێنرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ