رووداو دیجیتاڵ
بەگوێرەی ئامارەکانی هاتووچۆ، ساڵی رابردوو 98 کەس بە رووداوی هاتووچۆ لە هەرێمی کوردستان گیانیان لەدەستداوە، لەکاتێکدا ساڵی 2022 بەهۆی رووداوەکانەوە 445 کەس گیانیان لەدەستداوە. ئەفسەرێکی هاتووچۆ دەڵێت، کامێراکان و باشترکردنی رێگەکان هۆکاری کەمبوونەوەی رووداوەکانی هاتووچۆن.
ئامارەکە لەلایەن (پڕۆژەی سەلامەتیی رێگەوبان، کواڵیتی ئۆتۆمبێل و هۆشیاریی هاتووچۆ) راگەیێندراوە و بە تۆڕی میدیایی رووداو دراوە و تێیدا هاتووە: "ساڵی رابردوو لە هەرێمی کوردستان، 779 رووداوی هاتووچۆ روویانداوە و لە ئەنجامیاندا، 98 کەس گیانیان لەدەستداوە و هەزار و 437 کەسیش بریندار بوون".
ئاماری ساڵی 2023 بەردەست نییە، بەڵام بەگوێرەی ئاماری ساڵی 2022ـی هاتووچۆی هەرێمی کوردستان بۆ رووداو، لەو ساڵەدا سێ هەزار و 706 رووداوی هاتووچۆ روویاندابوو. لەو رووداوانەدا 445 کەس گیانیان لەدەستدابوو و حەوت هەزار و 250 کەسیش بریندار ببوون.
بەگوێرەی ئەو دوو ئامارە، لەو ماوەیەدا مردن بە رووداوی هاتووچۆ 78% کەمیکردووە، لە 445 گیانلەدەستدانەوە بووە بە 98 گیانلەدەستدان.
هەر بەگوێرەی ئاماری ساڵانی 2022 بۆ 2024، رووداوەکانی هاتووچۆ لە سێ هەزار و 706 رووداوەوە کەمیکردووە بۆ 779 رووداوی هاتووچۆ.
لەبارەی هۆکاری کەمبوونەوەی رووداوەکانەوە، ئەفسەری هاتووچۆ، موقەدەم سامان عەلی ئەمڕۆ سێشەممە بە تۆڕی میدیایی رووداوی گوت: "دانانی کامێراکانی خاڵ بۆ خاڵ و کامێراکانی دیکەی تۆمارکردنی تیژڕۆیی لە هۆکارە سەرەکییەکانی کەمبوونەوەی رووداوەکانی هاتووچۆن".
ئەو ئەفسەرەی هاتووچۆ دەشڵێت: "باشترکردنی رێگەی شار و نێوان شارەکان کە زۆرینەیان کراون بە دوو ساید، هۆکارێکی دیکەی کەمبوونەوەی رووداوەکانی هاتووچۆیە، لەگەڵ ئەوەشدا رۆڵی بەڕێوەبەرایەتییەکانی هاتووچۆ لە هۆشیارکردنەوە و رێکخستنی هاتووچۆ کاریگەریی باشی هەبووە".
هەر بەگوێرەی ئامارەکان، لە ساڵی 2020دا دوو هەزار و 413 رووداو روویانداوە، زۆرینەیان لە سلێمانی بووە کە هەزار و 19 رووداوە، پاشان لە هەولێر 748 رووداو و لە دهۆکیش 646 رووداو تۆمار کراون.
لە ئاماری رووداوەکانی هاتووچۆ لە ساڵی 2018شدا هاتووە، هەزار و 333 رووداو تۆمار کراون و لە ئەنجامیاندا 265 کەس گیانیان لەدەستداوە و هەزار و 394 کەسیش بریندار بوون.
.webp&w=3840&q=75)