رووداو دیجیتاڵ
690 هاونیشتمانی بۆ بەجێهێنانی فەریزەی حەج لە رێگەی وشکانییەوە لە دوێنێ هەینییەوە بەرەو سعودییە بەڕێکەوتوون؛ گوتەبێژی بەڕێوەبەرایەتیی حەج و عومرەی هەرێمی کوردستان دەڵێت، هاونیشتمانییان ئێستا لە کەربەلان و ئەمڕۆ بەرەو سعودیە بەڕێدەکەون.
رۆژی شەممە 10ـی حوزەیرانی 2023، کاروان ستوونی، گوتەبێژی بەڕێوەبەرایەتیی حەج و عومرەی هەرێمی کوردستان بە تۆڕی میدیایی رووداوی گوت، "690 کەس لە رێگەی وشکانییەوە ئەمساڵ بۆ یەکەمجار حەج دەکەن. ئەوان دوێنێ بە 30 پاس بەڕێکەوتن و شەوی رابردوو لە کەربەلا مانەوە؛ ئەمڕۆ بەرەو وڵاتی سعودیە بەڕێدەکەون."
کاروان ستوونی گوتی، شوێنی مانەوە و خواردن بۆ سەردانیکاران ئامادەکراوە؛ هەر پاسێک 23 کەسی تێدایە و هەریەکەیان دوو کورسی بۆ تەرخانکراوە بۆ ئەوەی ماندوو نەبێت.
پشکی ئەمساڵی هەرێمی کوردستان 4 هەزار و 685 حاجییە. جگە لەو 690 کەسەی ئەمڕۆ، بڕیارە 3 هەزار و 995 هاونیشتمانی لە رێگەی فڕۆکەخانەکانی هەولێر و سلێمانییەوە گەشتەکەیان بکەن. گوتەبێژی حەج و عومرە دەڵێت، یەکەم گەشتی ئاسمانی بۆ حەج 12ـی ئەم مانگە دەستپێدەکات.
تێچووی حەج بە رێگەی ئاسمانی 4 هەزار و 500 دۆلارە و بە رێگەی وشکانیش 3 هەزار و 800 دۆلارە.
.jpg&w=3840&q=75)
