رووداو دیجیتاڵ
بەڕێوەبەری پۆلیسی پارێزگای ورمێ دەڵێت، لە ماوەی 80 رۆژدا لەو پارێزگایە دەستیان بەسەر زیاتر لە یەک تۆن هۆشبەردا گرتووە و 5 هەزار کەسیش بەو هۆیەوە لەلایەن هێزەکانیانەوە دەستگیرکراون.
ئەمڕۆ دووشەممە، 9ـی حوزەیرانی 2025، رەحیم جەهانبەخش رایگەیاند، "لە 21-3-2025، تاوەکو ئەمڕۆ، لە چوارچێوەی هەوڵەکانیان بۆ بەرەنگاربوونەوەی مادەی هۆشبەر لە سنووری پارێزگاکە، تیمەکانیان دەستیان بەسەر زیاتر لە یەک تۆن مادەی هۆشبەردا گرتووە."
رەحیم جەهانبەخش گوتی، "5 هەزار کەس دەستبەسەر کراون کە 463 کەسیان فرۆشیاری مادەی هۆشبەرن و 4 هەزار و 489 کەسیشیان بەکارهێنەرن."
پار، بەڕێوەبەری پۆلیسی پارێزگای ورمێ رایگەیاندبوو، لە سنووری پارێزگاکە دەست بەسەر چوار تۆن و 700 کیلۆگرام مادەی هۆشبەردا گیراوە، 297 قاچاخچیش دەستگیرکراون و 61 باندی قاچاخ و ترانزێتی مادەی هۆشبەر لەنێوبراون.
پارێزگای ورمێی رۆژهەڵاتی کوردستان بەهۆی هاوسنووریی لەگەڵ تورکیا، هەرێمی کوردستان و ئازەربایجان وەک شوێنێکی ترانزێت بۆ قاچاخی مادەی هۆشبەر بەکاردەهێنرێت و ساڵانە لە پارێزگەکەدا دەست بەسەر نزیکەی پێنج تۆن مادەی هۆشبەردا دەگیرێت.
