رووداو دیجیتاڵ
باڵیۆزخانەی ئەمریکا بۆ سووریا داوا دەکات هێرشەکانی سەر نووسینگەکانی ئەنەکەسە رابگیرێن.
باڵیۆزخانەکە دەڵێت، "نیگەرانین لەو هەواڵانەی باس لە هێرشکردنە سەر نووسینگەکانی ئەنجوومەنی نیشتمانیی کورد - ئەنەکەسە لە باکووری سووریا دەکرێن و داوای بەپەلە وەستاندنی ئەم هێرشانە دەکەین."
رۆژی 1ـی ئادار لە شاری کۆبانێی رۆژئاوای کوردستان 'جوانێن شۆڕشگێڕ' هێرشیان کردە سەر نووسینگەی پارتی دیموکراتی کوردستان، سووریا - پەدەکەسە کە پێکهێنەری سەرەکیی ئەنجوومەنی نیشتمانیی کورد - ئەنەکەسەیە.
باڵیۆزخانەی ئەمریکا بۆ سووریا داواش لە هەموو لایەنەکان دەکات، "دەست بە گوتارێکی ئاشتییانە و مانادارەوە بگرن بۆ بەرەوپێشبردنی خواستەکانی گەلی سووریا بەبێ تووندوتیژی."
رۆژی 1ـی ئادار، سلێمان ئۆسۆ، ئەندامی دەستەی سەرۆکایەتیی ئەنجوومەنی نیشتمانیی کورد لە سووریا – ئەنەکەسە، بە تۆڕی میدیایی رووداوی گوت: "هێرشەکە لەلایەن جوانێن شۆڕشگێڕەوە کراوە، ئاگر لە بارەگاکەمان بەردراوە".
بەگوتەی سلێمان ئۆسۆ، بەهۆی هێرشەکەوە چەند کەسێکیان بریندار بوون و زیان بە ژمارەیەک ئۆتۆمبێلیشیان گەیشتووە.
.jpg&w=3840&q=75)
