پێشمەرگە و هاوپەیمانان تاوتوێی خێراترکردنی کارنامەی وەزارەتی پێشمەرگە دەکەن

 

رۆژی پێنجشەممە، 7-12-2023، وەزارەتی پێشمەرگەی هەرێمی کوردستان راگەیێندراوێکی لەبارەی کۆبوونەوەی بەرپرسانی وەزارەتی پێشمەرگە و هێزەکانی هاوپەیمانان بڵاوکردەوە کە بەپێی وەزارەتەکە لە کۆبوونەوەکەدا "کارنامەی هێزی پێشمەرگەی کوردستان و قۆناخەکانی جێبەجێکردنی یاداشتنامەی لێکتێگەیشتنی نێوان وەزارەتی پێشمەرگە و وەزارەتی بەرگریی ئەمریکا خرایە بەرباس و هەردوولا بە بایەخەوە باسیان لە جێبەجێکردنی تەواوی بڕگە و خاڵەکانی ناو یاداشتنامەی لێکتێگەیشتن کرد."

 

بەپێی وەزارەتی پێشمەرگە، لەو کۆبوونەوەیەدا کە هەریەک لە فەریق روکن عیسا عوزێر، سەرۆکی ئەرکانی وەزارەتی پێشمەرگە و جێگرانی سەرۆکی ئەرکان بۆ ئۆپەراسیۆنەکان و ئیدارە و میرە، بەرپرسی بنکەی ئۆپەراسیۆنەکان و بەڕێوبەری جووڵەکانی سەربازی و کۆڵۆنێڵ مەکێنزی، فەرماندەی هێزەکانی هاوپەیمانان لە هەرێمی کوردستان و تیمێکی راوێژکارانی سەربازی هاوپەیمانان ئامادەی بوون، سەرۆکی ئەرکانی وەزارەتی پێشمەرگە، رایگەیاندووە بەردەوامن و هەوڵەکانیان بۆ رێکخستنەوەی هێزە جیاوازەکانی پێشمەرگە چڕکردووەتەوە و خۆشبەختانە هەنگاوی گرنگ و باش نراون و خواستی بەرەوپێشبردنی ئەو پڕۆسەیەش بەردەوامە."

 

ئەوەشی گوتووە "کە پلانیان بۆ جێبەجێکردنی تەواوی بەرنامە و بڕگەکانی یاداشتنامەی لێکتێگەیشتن لەگەڵ ولایەتە یەکگرتووەکانی ئەمریکا بۆ یەکخستنەوەی هێزی پێشمەرگە هەیە، بۆ ئەوەش پێویستە هەمووان وەکو یەک تیم کاربکەین بۆ سەرخستنی ئەم پڕۆسەیە و بە دامەزراوەیکردنی سەربازییانەی هێزی پێشمەرگە کە هاوتابێت لەگەڵ پێشکەوتنەکانی سەربازی سەردەم."، وەکو ئەوەی لە راگەیێندراوەکەی وەزارەتی پێشمەرگەدا هاتووە.

 

شاندی هاوپەیمانان بەگوێرەی وەزارەتی پێشمەرگە "دڵخۆشی خۆیان بە هەوڵەکانی وەزارەتی پێشمەرگە دەربڕی و رایانگەیاندبەگرنگییەوە لە هەوڵ و هەنگاوەکانی وەزارەتی پێشمەرگە و حکومەتی هەرێم بۆ جێبەجێکردنی برگەکانی یاداشتنامەکە دەڕوانن ، هاوکات ئاماژەیان بەوەدا کە بەهاوبەشی و کاری پێکەوەیی لەگەڵ پێشمەرگە دەتوانین خێرایی بە پرۆسەی چاکسازی پێشمەرگە و پڕۆسەی ڕێکخستنەوەی هێزەکان بدەین." 

 

لە کۆتایی کۆبوونەوەکەدا جەخت لەگرنگی بەردەوامیی پشتگیری هاوپەیمانی نێودەوڵەتی لەهەرێمی کوردستان و هاوکاری وهەماهەنگیان لەگەڵ هێزی پێشمەرگەی کوردستان کرایەوە.

 

رۆژی چوارشەممە 21-09-2022، لە رێوڕه‌سمێكدا به‌ سه‌رپه‌رشتيى ‏نێچيرڤان بارزانى، سه‌رۆكى هه‌رێمى كوردستان و به‌ ئاماده‌بوونى ‏مه‌سرور بارزانى، سه‌رۆكوه‌زيرانى هه‌رێمى كوردستان؛ سێلێست واڵنده‌ر، ‏ياريده‌ده‌رى وه‌زيرى به‌رگريى ئه‌مريكا بۆ كاروبارى ئاسايشى نێوده‌وڵه‌تى؛ جێگرانی سه‌رۆکی هه‌رێمی کوردستان؛ جێگری سه‌رۆکوه‌زیرانی هه‌رێمی کوردستان؛ باڵیۆزی ئه‌مه‌ریکا له‌ عێراق ياداشتێكى لێكتێگه‌يشتن له‌نێوان ‏وه‌زاره‌تى پێشمه‌رگه‌ و وه‌زاره‌تى به‌رگريى ئه‌مريكادا واژۆ كرا.