رووداو دیجیتاڵ
بەڕێوەبەری سایلۆکانی سلێمانی رایگەیاند، رێکارەکانی خەرجکردنی نزیکەی 10 ملیار دیناری پارەی گەنمی جووتیاران تەواو بووە و سبەی چوارشەممە لە رێگەی بانکی بابانەوە دەست بە دابەشکردنی دەکرێت.
نەسرین ئەحمەد، بەڕێوەبەری سایلۆکانی سلێمانی بە رادیۆی رووداوی راگەیاند: "هیچ کێشەیەک لە دابەشکردنی پارەی گەنمی جووتیاراندا نەماوە؛ 9 ملیار و 700 ملیۆن دینار گەیشتووەتە سەر هەژماری بانکیمان و سبەی (چوارشەممە) جووتیارانی سنووری پارێزگای سلێمانی دەتوانن سەردانی بانکی بابان بکەن بۆ وەرگرتنی پارەکانیان."
سەبارەت بە هۆکاری دواکەوتنی دابەشکردنی ئەو بڕە پارەیە، بەڕێوەبەری سایلۆی سلێمانی روونی کردەوە، چەکی پارەکە لە 25ـی مانگی رابردوو (کانوونی یەکەمی 2025) لە بەغداوە گەیشتووە، بەڵام بەهۆی پشووەکانی سەری ساڵ و رێکارە ژمێریارییەکانی بانکەکان دابەشکردنەکە دواکەوتووە.
نەسرین ئەحمەد گوتی: "ساڵانە لە یەکەم رۆژی دەوامدا، بانکەکان سەرقاڵی وردبینی و رێکخستنەوەی ژمێریارییەکانی خۆیانن و هیچ مامەڵەیەکی دەرەکی ناکەن، بەڵام ئەمڕۆ پارەکە لە بانکی ناوەندیی هەرێم لە سلێمانی گواستراوەتەوە بۆ بانکی بابان و هەموو ئامادەکارییەک کراوە."
بەپێی ئامارەکانی سایلۆی سلێمانی، سەرەڕای خەرجکردنی ئەم بڕە پارەیە، بەڵام تاوەکو ئێستا 81 ملیار دیناری دیکەی پارەی گەنمی جووتیارانی سنوورەکە لای بەغدا ماوە و هێشتا خەرج نەکراوە.
