رووداو دیجیتاڵ
لەدوای باسکردنی کێشەکانی کەرتی گەشتیاریی دهۆک لە بەنامەی لەگەڵ رەنج، سەرۆكی دەستەی گەشتوگوزاری هەرێمی كوردستان دەڵێت، لە نزیكترین كاتدا سەردانی ئەو پارێزگایە دەكات و "بەپێی توانا چارەسەرێك بۆ ئەو كێشانە دەدۆزینەوە كە لەبەرنامەكەدا خرانەڕوو."
ئەمەل جەلال، سەرۆكی دەستەی گەشتوگوزاریی هەێمی كوردستان بە تۆڕی میدیایی رووداوی راگەیاند، دوای ئەوەی لە بەرنامەی لەگەڵ رەنج باسی كێشە و گرفتەكانی كەرتی گەشتیاری بەتایبەت لە پارێزگای دهۆك كرا، بڕیاریداوە لە نزیكترین دەرفەتدا سەردانی ئەو پارێزگایە بكات.
سەرۆكی دەستەی گەشتوگوزاری هەێمی كوردستان گوتی: "ئامانجی سەردانەكەمان بۆ ئەوەیە لە نزیكەوە بەدواداچوون بۆ كێشەكان بكەین بەپێی توانای حكومەت، چارەسەریان بۆ بدۆزینەوە، دەبێت بزانین لە دهۆك كەرتی تایبەت چی كردووە و ئێمەش وەك حكومەت چیمان پێبكرێت، درێخی ناكەین".
شەوی 05-01-2025 لە بەرنامەی لەگەڵ رەنج، ئیحسان عیسا، سەرۆكی كۆمەڵەی هۆتێل و بنكە گەشتییارییەكانی دهۆك باسی لەوە كرد كەرتی گەشتیاری لە دهۆك زۆر پاشەكشەی كردووە، بە جۆرێك كەمترین گەشتیار لە جەژن و بۆنەكاندا سەردانی پارێزگاكە دەكەن.
بە گوتەی ئیحسان عیسا بۆ سەری ساڵی 2025 لە کۆی 153 هۆتێل و مۆتێل و شوێنی مانەوەی گەشتیار 140یان لە بێ میوانیدا داخرابوون.
.webp&w=3840&q=75)