رووداو دیجیتاڵ
بە بڕیاری مەسرور بارزانی، سەرۆکوەزیرانی هەرێمی کوردستان پ. د. مەنهەل ئیلهام وەک سەرۆکی زانکۆی ئاکرێ دیاریکرا. کە ماوەی ساڵێک بوو ئەو پۆستەی بە وەکالەت بەڕێوەدەبرد.
بە گوێرەی نووسراوێک، کە رۆژی 26-2-2025، بە واژۆی مەسرور بارزانی، سەرۆکی حکومەتی هەرێمی کوردستان ئاراستەی وەزارەتی خوێندنی باڵا نێردراوە، فەرمانی دامەزراندن بۆ پ. د. مەنهەل ئیلهام بە پلەی بریکاری وەزیر و لە پۆستی سەرۆکی زانکۆی ئاکرێ بۆ زانستە کردارییەکان لەسەر میلاکی وەزارەتی خوێندنی باڵاو توێژینەوەی زانستی دەرچووە.
رۆژی دووشەممە، 03ـی ئاداری 2025، وەزارەتی خوێندنی باڵاو توێژینەوەی زانستی رایگەیاند، "بە فەرمانی حکومەتی هەرێمی کوردستان/ سەرۆکوەزیران، ژمارە 847 لە رێککەوتی 26-2-2025، بڕیارماندا بە دامەزراندنی پ. د. مەنهەل ئیلهام بە پلەی بریکاری وەزیر و لە پۆستی سەرۆکی زانکۆی ئاکرێ بۆ زانستە کردارییەکان."
پ. د. مەنهەل ئیلهام، سەرۆکی زانکۆی ئاکرێ بە رووداوی راگەیاند، نزیکەی ساڵێکە بە وەکالەت سەرۆکی زانکۆی ئاکرێیە، دوای ئەوەی پۆستەکە راگەیێندرا 18 کەس داواکارییان پێشکێشکرد بۆ وەرگرتنی ئەو پۆستە، بەڵام "سێ کەس هەڵبژێردراین و ناوەکان بۆ ئەنجوومەنی وەزیران نێردران."
سەرۆکی زانکۆی ئاکرێ گوتی: "ئەمڕۆ من وەک سەرۆکی زانکۆی ئاکرێ دامەزرام، ئەرکەکەم بە ئەمانەتەوە جێبەجێ دەکەم."
زانکۆی ئاکرێ، لە سێ کۆلێژ و دوو پەیمانگە پێکدێت، 21 بەشی هەیە، زیاتر لە پێنج هەزار و 300 خوێندکار و 500 مامۆستا و فەرمانبەری هەیە.
