ماکرۆن داوای قەدەخەکردنی ژیریی دەستکرد دەکات لە هەر شوێنێک کە هەڕەشە لە منداڵان بکات

رووداو دیجیتاڵ 

ئیمانوێل ماکرۆن، سەرۆککۆماری فەرەنسا رایگەیاند، دەبێت بەکارهێنانی ژیریی دەستکرد لە هەر بوارێکدا کە مەترسی بۆ سەر تەندروستیی دەروونیی منداڵان دروست بکات، بە تەواوی قەدەخە بکرێت.

ماکرۆن، کە لە هەمان کاتدا هەوڵ بۆ قەدەخەکردنی بەشێک لە تۆڕە کۆمەڵایەتییەکان بۆ مێرمنداڵانی خوار تەمەن 15 ساڵ دەدات، لە چاوپێکەوتنێکدا لەگەڵ رۆژنامەی لیس ئیکۆسی وڵاتەکەی گوتی: "ئەگەر لە هەندێک شێوازی بەکارهێنانی ژیریی دەستکرددا مەترسی بۆ سەر منداڵان هەبێت، دەبێت قەدەخە بکرێت. تەنیا لەبەر ئەوەی ژیریی دەستکردە، مانای ئەوە نییە ببێتە رۆژئاوای کێوی (بێ یاسا بێت)؛ هەرکاتێک هەڕەشە لە تەندروستیی دەروونی یان مێشکی منداڵان بکات، دەبێت رێگریی لێ بکرێت."

ئەم لێدوانانەی ماکرۆن هاوکاتە لەگەڵ ئامادەکارییەکان بۆ پەسەندکردنی پەیماننامەیەک لە کۆڕبەندی ئاشتیی پاریس. بڕیارە رۆژی سێشەممە لێژنەیەکی پسپۆڕان ژمارەیەک پێشنیاز پێشکەشی سەرۆکی فەرەنسا بکەن سەبارەت بە پاراستنی تاک لە مەترسییەکانی ژیریی دەستکرد، کە بوارێکە کەمتر لە لێکەوتەکانی تۆڕە کۆمەڵایەتییەکان لێکۆڵینەوەی لەسەر کراوە.

بەگوێرەی ئەو پەیماننامەیەی ئامادە کراوە، تاقیگە و کۆمپانیا زەبەلاحەکانی بواری تەکنەلۆژیا پابەند دەکرێن بە چەند رێکارێکەوە، لەوانە: هەڵسەنگاندنی سەربەخۆ بۆ سیستەمەکانی ژیریی دەستکردی بەرهەمهێنەر پێش خستنەبازاڕیان، لەگەڵ رێگەدان بە دەستگەیشتن بە داتای مۆدێلەکان. کۆشکی ئەلیزێ ئاماژەی بەوە کردووە، کۆمپانیا گەورەکانی ئەمریکا، بەتایبەت ئۆپن ئەی ئای و ئەنترۆپیک، بەشدار دەبن لە داڕشتنی ئەو بنەمایانەی کە لە داهاتوودا دەبنە هەوێنی یاسادانانی نیشتمانی و ئەورووپی.

ماکرۆن لەو بارەیەوە گوتی: "کۆمپانیاکان بنەمای وردبینیی پێشوەختە و بڕوانامەدانانی پێشوەختە پەسەند دەکەن، بە جۆرێک پێش ئەوەی مۆدێلەکان بگەنە دەستی منداڵان، پێداچوونەوەیان بۆ دەکرێت. ئێمە کار لەسەر پێشخستنی رێساکانی یەکێتیی ئەورووپا دەکەین و هانی ئەمریکییەکان، کەنەدییەکان و وڵاتانی دیکەش دەدەین هەمان هەنگاو بنێن؛ ئێمە لە پرۆسەی دانانی سەرەتاکانی یاساکانی سنووردارکردنی ژیریی دەستکردی پێشکەوتووداین."

سەرۆکی فەرەنسا روونیکردەوە کە مەبەست لەم هەنگاوە دروستکردنی چوارچێوەیەکە کە مەترسییەکان لەبەرچاو بگرێت؛ ئەو مەترسییانەش بۆ سێ ئاست دابەش دەبن: "منداڵەکانمان، ئاسایشی دیموکراسی و پرسە سەرەکییەکانی ئاسایشی نیشتمانی."

هەر لەم چوارچێوەیەدا، ماکرۆن لە رێگەی ڤیدیۆکۆنفرانسەوە نزیکەی 50 سەرۆکی وڵات و حکومەت، نوێنەرانی رێکخراوە نێودەوڵەتییەکان، کۆمپانیاکان، توێژەران و تاقیگەکانی کۆکردەوە بۆ تاوتوێکردنی ئەو مەترسییانەی ژیریی دەستکرد دروستیان دەکات بۆ سەر ئاسایشی بەکۆمەڵ. لە کۆتایی کۆبوونەوەکەدا، ماکرۆن لە پەیامێکدا لە پلاتفۆرمی ئێکس نووسی: "دەستنیشانکردنی کێشەکە هاوبەشە، دەبێت پێکەوە هەنگاو بنێین."

لەو ڤیدیۆکۆنفرانسەدا سەرۆکوەزیرانی بەریتانیا، کەنەدا، نەرویج، هۆڵەندا و ژاپۆن، شانبەشانی بەڕێوەبەرانی جێبەجێکاری کۆمپانیاکانی ئۆپن ئەی ئای، ئەنترۆپیک و میسترال و مایکرۆسۆفت بەشدار بوون.