رووداو دیجیتاڵ
عەلی زەیدی، سەرۆکوەزیرانی عێراق لەدوای کۆبوونەوەی لەگەڵ دۆناڵد ترەمپ، سەرۆکی ئەمریکا بە تۆڕی میدیایی رووداوی راگەیاند، "پێویستم بە هاوبەشێکی ستراتیجییە بارگرانیی ئابووریی عێراقم لەگەڵ هەڵگرێ."
دیار کوردە، پەیامنێری رووداو لە واشنتن پرسیاری لە عەلی زەیدی، سەرۆکوەزیرانی عێراق کرد، "بۆچی ئەمریکات وەکو یەکەم وڵات هەڵبژارد بۆ ئەوەی سەردانی بکەی؟ ئەو هەنگاوە کۆنکرێتیانە چین دەیگرنەبەر کاتێک دەگەڕێنەوە بۆ عێراق بۆ ئەوەی دڵنیایی بدەن کە ئەو رێککەوتنانەی دەیانکەن لە واشنتن دی سی جێبەجێ دەکرێن؟"
لە وەڵامدا زەیدی گوتی، "من ماستەرم لە ئابووری هەیە و دۆخی ئابووریم بەتەواوی لەبەرچاو گرتووە، بەڕاستی پێویستم بە هاوبەشێکی ستراتیجی هەیە بۆئەوەی ئەو بارگرانییەم لەگەڵ هەڵبگرێ، گرنگترین هاوبەشی ستراتیجی لە جیهان بریتییە لە ئەمریکا. بۆیە سەردانەکە لە ناخەوە بڕیارمان لێداوە."
سەرۆکوەزیرانی عێراق جەختی لەوە کردەوە، جیاوازی لەنێوان "هیچ شوێنێکی عێراقدا" ناکەن، "جیاکاری لەنێوان کوردستان و بەسرە و هیچ شوێنێکی عێراقدا ناکەین." زەیدی ئاماژەی بەوەش کرد، "عێراق وەکو یەک جەستە وایە."
هاوکات دۆناڵد ترەمپ بەڵێنی دا کە یارمەتیی عێراق بدات و گوتی، "ئێمە یارمەتیی عێراق دەدەین و دەمانەوێت هاوکارییان بکەین. پەیوەندییەکی ناوازەمان لەگەڵ سەرۆکوەزیرانی نوێ هەیە. کەسێکی بەهێزە. کەسێکی زۆر زیرەکە. ئەگەر وانەبوایە، ئەم هەڵبژاردنەی نەدەبردەوە. بەڕاستی هەڵبژاردنێکی زۆر بە ململانێ بوو. ئەمە چیرۆکێکی گەورەیە بۆ ئەو. دەمەوێت پێی بڵێم، ئەمریکا هەرگیز لەمە باشتری نەکردووە بۆ ئێوە."
