رووداو دیجیتاڵ
سەرۆکی پارتی بزووتنەوەی نەتەوەیی تورکیا (مەهەپە) دەڵێ، 15یەمین کۆنگرەی ئاسایی پارتەکەی لە رۆژی 7ی شوباتی 2027 سازدەکرێ.
ئەمڕۆ هەینی، 23ـی تشرینی یەکەمی 2026، دەوڵەت باخچەلی، سەرۆکی مەهەپە، دوای کۆبوونەوەی هاوبەشی دەستەی ناوەندیی بەڕێوەبردن، دەستەی ناوەندیی دیسیپلین و پەرلەمانتارانی فراکسیۆنی پارتەکەی، لە ئەنقەرە گوتارێکی پێشکێش کرد.
باخچەلی، جگە لە هەڵسەنگاندنی پێشهاتە سیاسی و ئابوورییەکانی تورکیا و پێشهاتە هەرێمی و جیهانییەکان، وادەی بەستنی 15یەمین کۆنگرەی ئاسایی پارتەکەیشی راگەیاند.
باخچەلی ئاماژەی بەوە کرد کە کۆنفرانسی شار و شارۆچکەکانیان تەواو بووە و گوتی، بڕیاردراوە 15یەمین کۆنگرەی ئاسایی مەهەپە لە رۆژی یەکشەممە، 7ی شوباتی 2027 ئەنجام بدرێ.
باخچەلی گوتی، مەهەپە "پاراستنی مانەوەی تورکیا، ئارامی و خۆشگوزەرانیی گەل، سەربەخۆیی دەوڵەت و یەکڕیزی و زیندوویی جیهانی تورک" بە خەمی سەرەکی دەزانێت و پارتەکەیشی لە قۆناخی داهاتوودا لەو چوارچێوەیەدا کاردەکات.
رێککەوتنی لیبیا و پەیوەندییەکان لەگەڵ ئازەربایجان
لە لێدوانەکەی باخچەلیدا رێککەوتنی تورکیا و لیبیا لەبارەی دەسەڵاتە دەریاییەکانەوە جێگەیەکی بەرفراوانی گرتەوە.
باخچەلی پەسندکردنی رێککەوتنەکەی لەلایەن ئەنجوومەنی نوێنەرانی لیبیاوە بە "پێشهاتێکی گرنگ" ناوبرد و گوتی، رێککەوتنەکە لە رووی پاراستنی مافەکانی تورکیاوە لە رۆژهەڵاتی دەریای سپی گرنگە.
سەرۆکی مەهەپە باسی لەوەش کرد، تورکیا دەستبەرداری مافەکانی خۆی لە سنوورە دەریاییەکاندا نابێت و ئاماژەی بەوەدا ئەنقەرە لە کاتی پێویستدا ئامرازە دیپلۆماسی، یاسایی و سیاسییەکان بەکاردەهێنێت.
باخچەلی هەڵسەنگاندنی بۆ بانگهێشتکردنی ئیلهام عەلیێڤ، سەرۆککۆماری ئازەربایجان لەلایەن رەجەب تەیب ئەردۆغان، سەرۆککۆماری تورکیاوە بۆ لووتکەکەی ئەنقەرە کرد.
بڕیارە رۆژانی 29 و 30ی ئەم مانگە ئیلهام عەلیێڤ سەردانی ئەنقەرە بکات بە مەبەستی بەشداریکردن لە لووتکەی رێکخراوی دەوڵەتانی تورک.
باخچەلی گوتی، پەیوەندییەکانی تورکیا و ئازەربایجان "لە سەرووی پێشهاتە سیاسییەکانی رۆژانە و ناکۆکییە کاتییەکانەوەن" و گوتی، پاراستنی متمانەی نێوان هەردوو وڵات بۆ داهاتووی جیهانی تورک گرنگە.
سەرۆکی مەهەپە گوتی، رەنگە ناکۆکیی بۆچوون لەنێوان دەوڵەتاندا رووبدات، بەڵام پێویستە ئەمانە "بەبێ زیانگەیاندن بە یاسای برایەتی، بە لێکتێگەیشتنی دوولایەنە و دیالۆگی راستەوخۆ" چارەسەر بکرێن.
باخچەلی لە بەشی کۆتایی لێدوانەکەیدا، پابەندبوونی بە هاوپەیمانیی جمهوورەوە دووپاتکردەوە و گوتی، ئەندامانی مەهەپە لە بەرپرسیارێتیی سیاسیی هاوپەیمانیی جمهوور تێدەگەن و رایگەیاند، پاراستنی سەربەخۆیی و سەروەریی تورکیا، بەهێزکردنی یەکڕیزی و پێکەوەیی نیشتمانی و بەشداریکردن لە داهاتووی جیهانی تورک، کاری لەپێشینەی سەرەکییانە.
