رووداو - دیجیتاڵ
سەرۆکی گشتیی پارتی زافەر، لەبارەی پێشهاتە سیاسییەکان و دۆسیەی ئەگەری ئازادکردن یان لێخۆشبوون لە ئۆپۆزسیۆن و پەکەکە، ئاماژەی بەوە کرد، رەنگە یاسای لێخۆشبوون بۆ پەکەکە ببریێتە دادگەی دەستووریی تورکیا و لەوێشەوە ببریێتە چوارچێوەی لێخۆشبوونی گشتی.
ئومیت ئۆزداغ رایگەیاند، دەسەڵاتدارانی ئاکپارتی ئێستا لە نێوان دوو بژارەدا دوودڵن، ئاخۆ خۆیان راستەوخۆ لێخۆشبوونەکە دەربکەن یان لەرێگەی دادگەی دەستوورییەوە بەپێی بنەمای یەکسانی بێت.
ئۆزداغ ئاماژەی بە راپرسییە نوێیەکان کرد و ئاشکرای کرد، ئەگەر پارتی زافەر و ئیی پارتی بە لیستی هاوبەش بەشداری لە هەڵبژاردنەکاندا بکەن، دەتوانن لەنێوان %15 تا %25ی دەنگەکان بەدەستبهێنن.
لەبارەی کاندیدبوونی مەنسور یاڤاشی گوتی، تاوەکو خۆی بە فەرمی راینەگەیێنێت هیچ لێدوانێک نادات.
ئەم لێدوانانەی ئۆزداغ رەنگدانەوەی بەردەوامیی گوشاری رەوتە نەتەوەپەرستەکانە لەسەر دانوستاندنە ئەگەرییەکان و گۆڕانکارییە یاسایییەکانی پەیوەست بە دۆسیەی کورد و پەکەکە لە تورکیا.
