رووداو دیجیتاڵ
رەجەب تەیب ئەردۆغان، سەرۆککۆماری تورکیا و دۆناڵد ترەمپ، سەرۆکی ئەمریکا لە پەیوەندییەکی تەلەفۆنیدا، تاوتوێی پەیوەندییە دووقۆڵییەکانی نێوان ئەنقەرە و واشنتن، گرژییەکانی تەنگەی هورمز، دۆخی یەمەن و جەنگی رووسیا و ئۆکراینایان کرد.
فەرمانگەی پەیوەندییەکانی سەرۆکایەتیی کۆماری تورکیا لە راگەیێندراوێکدا بڵاویکردەوە، چوارشەممە، 28ی تشرینی یەکەمی 2026، هەردوو سەرۆک لە رێگەی تەلەفۆنەوە قسەیان کردووە؛ ئەردۆغان ئاماژەی بەوە کردووە کە ساڵی داهاتوو 100 ساڵ بەسەر پەیوەندییە دیپلۆماسییەکانی هەردوو وڵاتدا تێدەپەڕێت و وڵاتەکەی سوورە لەسەر پەرەپێدانی هاریکارییەکان لە سەرجەم بوارەکاندا.
لە بەشێکی پەیوەندییەکەدا، سەرۆککۆماری تورکیا جەختی لەوە کردەوە کە ئەوان لە چوارچێوەی "هاوپەیمانیی بەرگریی هاوبەشی مەککە"ـدا لە نزیکەوە چاودێریی پێشهاتە سەربازییەکانی تەنگەی هورمز و کێشەی یەمەن دەکەن و هەوڵەکانیان چڕکردووەتەوە تاوەکو ئاڵۆزییەکان لەسەر بنەمای دیپلۆماسی چارەسەر بکرێن.
هەروەها ئەردۆغان ئامادەیی ئەنقەرەی دەربڕییەوە بۆ نێوەندگیکردن و زیندووکردنەوەی کەناڵە دیپلۆماسییەکان لە نێوان رووسیا و ئۆکراینا، بە مەبەستی کۆتاییهێنان بە جەنگی نێوانیان.
لەلایەن خۆیەوە، دۆناڵد ترەمپ، سەرۆکی ئەمریکا، پیرۆزبایی 103یەمین ساڵیادی دامەزراندنی کۆماری تورکیای لە ئەردۆغان و گەلی تورکیا کرد، هاوکات هیوای سەرکەوتنی بۆ لووتکەی داهاتووی رێکخراوی دەوڵەتانی تورک خواست.
.jpg&w=3840&q=75)
