رووداو دیجیتاڵ
سەرکردایەتیی بزووتنەوەی ئاپۆچی سەبارەت پرۆژەیاسای تایبەت بە پرۆسەی چارەسەریی پرسی کورد دەڵێت، بەکارهێنانی چەمکەکانی وەک "تیرۆر" و "رێکخراوی تیرۆریستی" لەلایەن تورکیاوە پڕۆسەکە تووشی کێشە دەکات؛ ئاماژە بەوەش دەکات، پێویستە پێگەی عەبدوڵڵا ئۆجەلان لەبەرچاوبگیرێت.
رۆژی پێنجشەممە، 30ـی تەممووزی 2026، سەرکردایەتیی بزووتنەوەی ئاپۆچی لە قەندیل لە راگەیێندراوێکدا بە پێویستی زانی کە لە هەوڵەکانی تایبەت بە پڕۆسەی چارەسەریی پرسی کورددا لە تورکیا، پێگەی عەبدوڵڵا ئۆجەلان لەبەرچاو بگیرێت و دیاری بکرێت.
لە راگەیێندراوەکەدا ئاماژە بەوە کراوە، گومان لە جیدییەتی مامەڵەکردن لەگەڵ ئەم پڕۆژەیاسایە هەیە و تاوەکو ئێستاش لە رووی زمان و پێناسەکردنی چەمکەکانەوە ئاستەنگ لەبەردەم پێشڤەچوونی پرۆسەکەدا هەیە.
لە راگەیێندراوەکەدا هاتووە، ئۆجەلان لە دیداری 20ـی تەممووزدا لەگەڵ شاندی پارتی یەکسانی و دیموکراسیی گەلان (دەم پارتی) جەختی لەوە کردەوە کە دەبێت پڕۆژەیاساکە فراوان بێت و خزمەت بە داهاتوو بکات، نەوەک سادە و سنووردار بێت، چونکە چاوەڕوان دەکرێت ببێتە هەنگاوێک بۆ نەهێشتنی دابڕانی 100 ساڵەی نێوان دەوڵەتی تورکیا و گەلی کورد.
سەرکردایەتیی بزووتنەوەکە جەختی لە گرنگیی بەکارهێنانی زمانی ئاشتی دەکاتەوە و دەڵێت، "بۆ رێکخراوێک (پەکەکە) کە خۆی هەڵوەشاندووەتەوە و خەباتی چەکداری دژی تورکیا کۆتایی پێهێناوە، هێشتا بەکارهێنانی چەمکەکانی وەک تیرۆر و رێکخراوی تیرۆریستی پرۆسەکە تووشی کێشە دەکات. دەبێت زمان، پێناسەکردن و نێوەڕۆک لەگەڵ ئامانجەکەدا بگونجێت."
سەبارەت بە رۆڵی ئۆجەلان لە بەڕێوەبردنی پرۆسەکەدا، لە راگەیێندراوەکەدا هاتووە، "لە گفتوگۆکانی ئیمراڵیدا هاتووە کە رێبەر ئاپۆ ببێتە هۆکار و رێکخەری ئاشتی و پرۆسەی بەسیاسیکردن. بێ رۆڵی راستەوخۆی رێبەر ئاپۆ و بەڕێوەبردنی پرۆسەکە، جێبەجێکردنی بڕیارەکان و یاساکە ئەستەم دەبێت. لەبەرچاونەگرتنی پێگەی رێبەر ئاپۆ لە یاساکەدا رێگری لە جێبەجێکردنی دەکات. هەڵوێستی کۆتاییشمان دوای بینینی دەقەکە دەبێت."
بزووتنەوەی ئاپۆچی ئەو ناوەیە کە بۆ پارتی کرێکارانی کوردستان لەلایەن قەندیلەوە بەکاردەهێندرێت دوای بڕیاری خۆهەڵوەشاندنەوەی لە ئایاری 2025ـدا.
پرۆسەی چارەسەری کە لەلایەن قەندیلەوە بە پرۆسەی ئاشتی و کۆمەڵگەی دیموکراسی و لەلایەن تورکیاوە بە پڕۆسەی تورکیای بێ تیرۆری ناسراوە، هەوڵێکە بۆ کۆتاییهێنان بە ململانێ چەکدارییەکانی چەندین دەیەی نێوان پەکەکە و دەوڵەتی تورکیا و هەنگاونانی زیاتر بە ئاراستەی چارەسەرکردنی پرسی کورد لەو وڵاتەدا.
لەم چوارچێوەیەدا، گفتوگۆکان لەسەر ئامادەکردنی پرۆژەیاسایەکی تایبەت بە پرۆسەکە لە پەرلەمانی تورکیا چڕبوونەتەوە بۆ ئەوەی رێگەخۆشکەر بێت بۆ دەستپێکردنی قۆناخی چەکدانان و بەسیاسیکردنی بزووتنەوەکە.
