رووداو دیجیتاڵ
حکومەتی بەریتانیا پشتگیریی خۆی بۆ بڕیاری هەڵوەشاندنەوەی هێزەکانی سووریای دیموکرات (هەسەدە) و تێکەڵبوونیان لەنێو دامەزراوەکانی دەوڵەتی سووریا دەربڕی. نێردەی ئەو وڵاتەش هەنگاوەکە بە "سەرەتایەک بۆ گەڕانەوەی ئاشتی و یەکپارچەیی" بۆ سووریا ناو دەبات.
رۆژی چوارشەممە، 26ـی ئابی 2026، باری پیچ، نێردەی تایبەتی بەریتانیا بۆ سووریا بە وەکالەت، لە هەژماری فەرمیی خۆی لە تۆڕی کۆمەڵایەتیی (ئێکس) رایگەیاند: "پێشوازی لەو راگەیێندراوەی ئەم دواییە دەکەین دەربارەی هەڵوەشاندنەوەی هێزەکانی سووریای دیموکرات وەک هێزێکی سەربازیی سەربەخۆ."
ئەو دیپلۆماتە بەریتانییە ئاماژەی بەوە کرد، کە تێکەڵبوونی هەسەدە لەپاڵ دامەزراوەکانی "بەڕێوەبەرایەتیی خۆسەر" لە چوارچێوەی دەوڵەتی سووریادا، وەرچەرخانێکی ئەرێنییە و گوتی: "ئەمە هەنگاوێکی گرنگە بەرەو سووریایەکی یەکگرتوو کە سوود لە ئاشتی و سەقامگیری وەربگرێت."
ئەم هەڵوێستەی لەندەن دوای ئەوە دێت، کە دوێنێ بە فەرمی پڕۆسەی تێکەڵبوونی هێزە کوردییەکان و دامەزراوەکانی ئیدارەی خۆسەر لەنێو حکومەتی ناوەندیی سووریا راگەیێندرا.
ئەم گۆڕانکارییە ریشەییانە بەشێکن لەو رێککەوتنە مێژووییەی کە لە مانگی کانوونی دووەمی ئەمساڵدا لە دیمەشق، لە نێوان مەزڵووم عەبدی، فەرماندەی گشتیی پێشووی هەسەدە و ئەحمەد شەڕع، سەرۆکی حکومەتی سووریا واژۆکرا، بە مەبەستی کۆتاییهێنان بە دەیان ساڵ ململانێ و دابەشبوونی دەسەڵات لە وڵاتەکەدا.
