رووداو دیجیتاڵ
نووسینگەی راگەیاندنی حکومەتی دووبەی رایگەیاند، بەهۆی کەوتنی پاشماوەی تێکشکاندنی ئامانجێکی ئاسمانی لەلایەن بەرگریی ئاسمانییەوە، ئاگر لە خانوویێکی چۆڵکراو کەوتووەتەوە و بەو هۆیەوە چوار کەس بە سووکی بریندار بوون.
نووسینگەی راگەیاندنی حکومەتی دووبەی لە راگەیێندراوێکدا بڵاویکردەوە، تیمە پەیوەندیدارەکان لە دووبەی مامەڵەیان لەگەڵ رووداوێکی ئاگرکەوتنەوە کردووە لە خانوویێکی چۆڵکراو لە ناوچەی بەدەع.
بەپێی راگەیێندراوەکە، ئاگرەکە لە ئەنجامی کەوتنی پارچەیەک کە لە مووشەکێکی تێکشکاو دروست بووە، کە لەلایەن بەرگریی ئاسمانییەوە خراوەتە خوارەوە.
سەبارەت بە زیانە گیانییەکان، نووسینگەکە ئاشکرای کردووە کە "بەهۆی رووداوەکە چوار کەس کە لە نزیک خانووەکە بوون بە سووکی بریندار بوون"، بەڵام برینەکانیان مەترسیدار نییە.
نووسینگەکە دەڵێت، تیمەکانی بەرگریی شارستانی و لایەنە پەیوەندیدارەکانی دووبەی گەیشتوونەتە شوێنی رووداوەکە بۆ کۆنترۆڵکردنی ئاگرەکە و گرتنەبەری رێوشوێنە پێویستەکان.
.jpg&w=3840&q=75)
