رووداو دیجیتاڵ
گوتەبێژی سوپای پاسداران هەڕەشە لە بەریتانیا دەکات و دەڵێت، ئەگەر هاوکاریی ئەمریکا بکات بۆ هێرشکردنە سەر وڵاتەکەی، ئەوە دەبێتە ئامانجی ''راستەوخۆ و رەوای'' هێزە چەکدارەکانیان.
بەرەبەیانی ئەمڕۆ یەکشەممە 26-07-2026، حوسێن موحیبی، گوتەبێژی سوپای پاسداران سەبارەت بە ئەگەری هاوکاریکردنی ئەمریکا لەلایەن وڵاتانی دیکەوە رایگەیاند، "هەر وڵاتێک بۆ هێرشکردنە سەر ئێران هاوکاریی واشنتن بکات، بێگومان هێرشی دەکەینە سەر''.
حوسێن موحیبی ئاماژەی بە بەکارهێنانی بنکەی ئاسمانیی راف فێرفۆردی بەریتانیا کرد لەلایەن ئەمریکاوە و گوتی: ''لەم دواییەدا بۆمبهاوێژی B1ـی ئەمریکا فڕۆکەخانەکانی بەریتانیایان بەکارهێناوە. ئەگەر ئەو وڵاتە هاوکاریی ئەمریکا بکات، ئەوە ئەویش دەبێتە ئامانجی راستەوخۆ و رەوای ئێمە.''
23ـی تەمموز بەرپرسانی بەریتانیا رایانگەیاند، ویلایەتە یەکگرتووەکانی ئەمریکا فڕۆکەیەکی بۆمبهاوێژی جۆری (B-1)ـی لە بنکەیەکی سەربازیی بەریتانیاوە بۆ هێرشکردنە سەر ئێران جێگیر کردووە، ئەمەش لە کاتێکدایە دۆناڵد ترەمپ، هێرشەکانی بۆ سەر ئەو وڵاتە چڕتر کردبووەوە.
ئەمە یەکەم مامەڵە و رێگەپێدانی سەربازییە لەو شێوەیەیە لەنێو خاکی بەریتانیاوە بکرێت لەوەتەی ئاندی بێرنەم، بووەتە سەرۆکوەزیرانی بەریتانیا.
لە سەرەتای جەنگەوە کە 28ـی شوبات دەستیپێکرد، ئێران بە پاساوی پاڵپشتیکردنیان لە ئەمریکا، هێرشی کردووەتە سەر وڵاتانی ناوچەکەش. حوسێن موحیبی ئاماژەی بەوە کرد، بە لێدان لە بنکەکانی ئەمریکا لە وڵاتانی کەنداو، زیاتر لە 200 سەربازیان کوشتووە و ژمارەیەکی زیاتریش بریندار بوون.
13 رۆژی لەسەر یەک بوو ئەمریکا لە هێرشکردنە سەر ژێرخانی سەربازیی ئێران بەردەوام بوو. لە بەرامبەردا ئێرانیش بە پاساوی زیانگەیاندن بە بەرژەوەندییەکانی ئەمریکا بە درۆن و مووشەک هێرشی دەکردە سەر وڵاتانی ناوچەکە، بەڵام دوو رۆژە پێکدادانەکان راگیراون.
