وردەکاریی بارانبارین و لافاوەکەی شەوی رابردووی هەولێر

رووداو دیجیتاڵ

بەڕێوەبەری کەشناسیی هەرێمی کوردستان دەڵێ، پێشبینی بارانی دوێنێ شەوی هەولێریان کردبوو، بەڵام بڕەکەی نەزانراو بوو؛ ئاماژە بەوەش دەکات، شەپۆلەکە ئەمڕۆش بەردەوام دەبێت بەڵام لاوازتر.

رۆژی یەکشەممە، 8ی تشرینی یەکەمی 2026، فازل ئیبراهیم، بەڕێوەبەری گشتیی کەشناسی و بومەلەرزەزانیی هەرێمی کوردستان بە رووداوی گوت: "رۆژانە پێشبینییەکانی کەشوهەوا رادەستی پارێزگاکان، شارەوانی و وەزارەتەکان دەکرێ. پێشبینی چڕبوونەوەی بارانەکەی شەوی رابردووی هەولێر کرابوو، بەڵام رێژەی دابارینەکە نەزانراو بوو. "

سەبارەت بە بەردەوامی شەپۆلەکە، فازڵ ئیبراهیم گوتی، ئەمڕۆش شەپۆلی بارانبارین بەردەوام دەبێت، بەڵام بە شێوەیەکی لاوازتر؛ سبەی دووشەممەش کەشەکە ئاسایی دەبێتەوە.

 بە پێی بڵاوکراوەی رۆژی شەممەی کەشناسیی هەرێمی کوردستان، "لە دوای نیوەڕۆوە، لە هەندێک ناوچەی هەرێمی کوردستان پێشبینی بارانی بەلێزمە و هەورە برووسکە دەکرێ، بە تایبەت لە سنووری پارێزگای سلێمانی، سەنتەری پارێزگای هەولێر، ئیدارەی سەربەخۆی سۆران، بەشێک لە باشووری رۆژهەڵاتی پارێزگای دهۆک و ئیدارەی سەربەخۆی گەرمیان."

ساتی درووستبوونی لافاوەکە

دەوروبەری کاژێر 5:30ی ئێوارەی شەممە، بارانی بەخوڕ لە شاری هەولێر دەستیپێکرد، بەڵام کاژێر 7:00 بارانەکە چڕ بووەوە و بە گوتەی ئومێد خۆشناو، پارێزگاری هەولێر، لە دوو کاژێردا نزیکەی 80 ملم باران باری و وردە وردە ئاو رێگە و بانی داپۆشی، مەنهۆڵەکانی پڕکرد و بەشێکی نزمەپردەکان پڕ ئاو بوون.

لەبارەی خنکانی محەممەد رەسووڵەوە، رووداو زانیویەتی لە کاتی لافاوە بەهێزەکەی هەولێر، لە ماڵی خۆی چووەتە دەرەوە ویستویەتی گەنجێکی گیرخواردوو لەسەر ماتۆڕ رزگاربکات. 

لەبارەی مستەفا سەرکەوت، منداڵە 5 ساڵانەکە، بەپێی گێڕانەوەی کەسوکاریان بۆ رووداو، باوکی مستەفا، لە گەڕەکی هەولێری نوێ دابەزیوە کولێرە بکڕێ و منداڵەکە لەنێو ئۆتۆمبێلەکەدا بووە.