رووداو دیجیتاڵ بەراورد بە سێ رۆژ لەمەوبەر، کیلۆیەک مریشکی زیندوو 500 دینار دابەزی. نازم عەبدوڵڵا، سەرۆکی کۆمەڵەی پەلەوەرخانەکانی سلێمانی و گەرمیان، ئەمڕۆ 23ـی تەمموزی 2026 بە تۆڕی میدیایی رووداوی گوت: "کیلۆیەک مریشکی گەورە لە پەلەوەرخانەکان بە کۆ 2800 دینارە". 20ـی تەمموز، کیلۆیەک مریشکی زیندوو لە پەلەوەرخانەکان بەرزبووەوە بۆ 3750 دینار و لە دووکانەکان بە 4000 هەزار بۆ 4250 دینار بوو. نازم عەبدوڵڵا گوتی: "بەگوێرەی نرخی ئەمڕۆ، کیلۆیەک مریشک لای مریشکفرۆشەکان دەبێت بە کەمتر لە 3500 دینار بفرۆشرێت". هیوا عومەر، مریشکفرۆشە لە سلێمانی و بە رووداوی گوت: "یەک کیلۆ مریشک بە 3500 دینار دەدەین، دوێنێ مریشکمان بۆ هاتووە و ئەگەر بە نرخی ئەمڕۆ مریشک بکڕین کیلۆی دەکەینە 3 هەزار و 250 دینار". شێروان محەممەد، مریشکفرۆشە لە هەولێر و ئەمڕۆ بە تۆڕی میدیایی رووداوی گوت، کیلۆی مریشک بە 3 هەزار و 800 دینارە، چونکە پێشتر بە کۆ کڕیویانە بە 3550 دینار و لەگەڵ گەیشتنی مریشک بە نرخی نوێ، نرخ دادەبەزێنن. سەرۆکی کۆمەڵەی پەلەوەرخانەکانی سلێمانی و گەرمیان ئاماژەی بەوەکرد، هۆکاری دابەزینی نرخ پەیوەستە بە خواست و خستنەڕوو، ئەگەر خواست کەم بێ و مریشک زۆر، ئەوە نرخ دادەبەزێت. سەرەتای ئایاری ئەم ساڵ کیلۆیەک مریشکی زیندوو لە بازاڕەکانی هەرێمی کوردستان بە 2500 دینار دەگەیشتە دەستی هاونیشتمانییان، بەڵام 20ـی تەمموز گەیشتە زیاتر لە 4000 هەزار دینار.
هەواڵە ناوخۆییەکان23-07-2026وەزارەتی کارەبا بۆ رووداو: داشکانی 50%ـی قەرزی کارەبا لە سەرەتای مانگی ئابەوە دەستپێدەکات
