رووداو دیجیتاڵ
پارێزگاری هەولێر دەڵێت، لە 28ی شوباتەوە بە 650 درۆن و مووشەک هێرشی کراوەتە سەر هەرێمی کوردستان کە 516 یان بۆ سەر هەولێر بوون و زیانی گیانی و مادییان هەبووە. ئومێد خۆشناو گوتی، بودجەیەکی تایبەت لە عێراق هەیە و پێویستە بەغدا قەرەبووی زیانلێکەوتووانی هێرشەکان بکاتەوە.
ئومێد خۆشناو، پارێزگاری هەولێر قسەی بۆ تۆڕی میدیایی رووداو کرد و گوتی، لە ئەنجامی هێرشەکان بەرهەمهێنانی گازی ماڵان کەمی کردووە و دڵنیایی دایە هاونیشتمانییان، رێکارەکان بۆ چارەسەرکردنی ئەو گرفتە و جێگیرکردنی نرخی هەموو جۆرەکانی سووتەمەنی بەردەوامە.
ئومێد خۆشناو، پارێزگاری هەولێر، میوانی نیوڕۆژی تۆڕی میدیایی رووداو بوو، کە سەنگەر عەبدولڕەحمان پێشکێشی دەکات و باسی لە دۆخی سنوورەکە و ئەو هێرشانە کرد دەکرێنە سەر هەولێر و دەوروبەری.
"بێ هۆکار هێرش دەکرێت"
لە چوارچێوەی تۆمارکردنی ئاماری هێرشەکانی سەر هەرێمی کوردستان، تۆڕی میدیایی رووداو ئەمڕۆ بڵاویکردەوە، لە 24 کاژێری رابردوودا 12 هێرشی درۆنی کراونەتە سەر هەرێمی کوردستان؛ سێ بۆسەر سلێمانی و 9 بۆسەر هەولێر بوون. ئومێد خۆشناو لە قسەکانیدا بۆ رووداو رایگەیاند: "راستە لە 24 کاژێری رابردوودا بە 9 درۆن پارێزگای هەولێر بۆردوومان کراوە".
پارێزگاری هەولێر گوتی: "ئەو هێرشانەی دەکرێنە سەر هەرێمی کوردستان و لەنێویدا هەولێری پایتەخت بێ بنەمان و هیچ هۆکارێکیان نییە، بۆیە هەموو ئەو ئامانجانەی دەپێکرێن، هێرشەکان کە دەکرێنە سەر خەڵکی بێ تاوان، سەر ماڵ و خەڵکی سڤیل، هەروەها دامەزراوە سەربازییەکانیشمان کە پەلامار دراون، بەشێک نین لە کێشەکە، واتە ئاسمان، خاک و خەڵکی ئێمە بە سڤیل و یەکە سەربازییەکانەوە بێ هۆکار دەکرێنە ئامانج و هیچ هۆکارێک نییە هێرش دەکرێتە سەریان".
ئومێد خۆشناو گوتی: "لە ئاستی باڵا و دامەزراوەکان چەندین جار رامانگەیاندووە و هیچ زمانێک نەماوە بەکاری نەهێنین، کە ئێمە بەشێک نین لەو کێشە و ناشمانەوێ بەشێک بین. ئەو شەڕە شەڕی ئێمە نییە و هەرێمی کوردستان خواستی ئەوەیە ئارامی لە ناوچەکەدا هەبێ".
پارێزگاری هەولێر گوتی، ئەو مووشەک و درۆنانەی "راستەخۆ لەلایەن ئێرانەوە" هێرشیان پێ دەکرێتە سەر هەرێمی کوردستان یان ئەوانەی "تیرۆریست و میلیشیاکان" هێرشیان پێ دەکەن، هاووڵاتی سڤیلیان پێ دەبێتە قوربانی و هاووڵاتیی زیانمەندی یەکەمی هێرشەکانن".
"زۆرینەی هێرشەکان لە قەڵەمڕەوی عێراقەوە دەکرێن"
ئومێد خۆشناو، حکومەتی عێراقی بە کەمتەرخەم لەبەرامبەر هێرشەکان بۆسەر هەولێر و هەرێمی کوردستان دەزانێت و هۆکارەکەشی بۆ ئەوە دەگەڕێنێتەوە کە "زۆرینەی هێرشەکان لەژێر قەڵەمڕەویی حکومەتی عێراقەوە دەکرێن".
پارێزگاری هەولێر لەبارەی ئەو گرووپە چەکدارە عێراقییانەی زۆرینەی هێرشەکانی سەر هەرێمی کوردستانیان لە ئەستۆ گرتووە، گوتی، ئەوان بە "لە یاسا دەرچوو" ناویان دەهێنن، لەکاتێکدا "یاسایین و لەچوارچێوەی بەرگری عێراقدان".
"14 شەهید و 93 بریندار هەن"
ئومێد خۆشناو گوتی: "650 هێرش لەسەر هەرێمی کوردستان، لەنێویاندا 516 هێرش کراوەتە سەر هەولێر؛ لە رووداوەکاندا 14 شەهید هەن، شەشیان پێشمەرگەکانی سپیلیکن، یەکێکیان ئاسایشەکەی فڕۆکەخانەی هەولێرە، یەکێکیشیان سەربازە فەرەنسییەکەیە کە لە چوارچێوەی ئەرکی هاوپەیمانی نێودەوڵەتی بۆ راهێنانی پێشمەرگە لێرە بوون و هیچ پەیوەندی بەو دۆخە نەبووە".
ئومێد خۆشناو دەڵێ: "جگە لەوانەی شەهید بوون، 93 بریندار هەن کە لە نەخۆشخانەکان تۆمارکراون و چارەسەرییان وەرگرتووە و بەشی هەرە زۆریان چارەسەر کراون".
پارێزگاری هەولێر گوتی: "جگە لە زیانە گیانییەکان، هاووڵاتییەکی زۆر زیانی مادی بەرکەوتووە. لە خانووی خەڵک یان کۆمپانیا و یەکەکانی یشتەجێبوون دراوە. ژووری ئۆپەراسیۆنەکانی پارێزگای هەولێر لیژنەی هاوبەشی پێکهێناوە و هەموو زیانەکانیان لە رێگەی تیمەوە بە چوون بۆ شوێنەکان تۆمارکردووە، بەڵام لە رووی قەرەبووکردنیانەوە دۆخی هەرێمی کوردستان روونە. حکومەتی عێراق بودجەی فریاگوزاری هەیە، بەشی هەرێمی کوردستان [لە پشکی دارایی] لە بودجە دەگەڕێندرێتەوە، بۆیە ئەو بودجەیە تەنیا بۆ شارەکانی نێوەڕاست و خوارووی عێراق نییە، بە دڵنیاییەوە ئەرکی حکومەتی عێراق قەرەبووی خەڵکی هەرێمی کوردستانیشی پێ بکاتەوە".
پارێزگاری هەولێر گوتی: "سیستمی بەرگری ئاسمانیی هەولێر لە بەرزترین ئاستی خۆیدا کاردەکات. ئەگەر سەیری ژمارەی هێرشەکان بکەین، ئەو سیستمە و بەرپەرچدانەوەی نەبوایە کارەساتی زۆر گەورە دروست دەبوو. بەرپرسیارێتی ئاسمانی هەرێمی کوردستان لە ئەستۆی حکومەتی عێراقییە".
"پرسی بڕی خۆراک و بەنزین"
پارێزگاری هەولێر لە بەردەوامی قسەکانیدا ئاماژەی بەوە کرد، ئەو جەنگەی لە ناوچەکە هەیە کاریگەری لەسەر جیهان هەبووە، نەوەک تەنیا هەرێمی کوردستان و هەولێر و گوتی: "دڵنیایی بە هاووڵاتییان دەدەین، لە خۆراک و پێداویستییەکان هیچ کەموکورتییەک نییە و ئەوەی پێویستە لە بەردەستە، دەروازەکانیش دانەخراون و خۆراک و پێداویستییەکان بە ئاسانی بە خەڵک دەگەن و هیچ دڵەڕاوکێیەکیان نەبێ".
یەکێک لە لێکەوتەکانی جەنگ، بەرهەمهێنانی گاز بوو لە هەرێمی کوردستان، لەنێویاندا گازی ماڵان و ئەوی دیکەش بەرهەمهێنانی کارەبا لە رێگەی گازەوە. پارێزگاری هەولێر گوتی: "ئەوەی کارەبا ئێمە بە ناچاری پەنامان بۆ موەلیدەکان برد، بەڵام ئیستا لە دۆخێکی ئاساییداین و دۆخی کارەبا 24 کاژێرییە؛ ئەوانەی لە پڕۆژەی رووناکیدان و دۆخەکەیان ئاسایی بووەتەوە".
"دابەشکردنی نەوت و بەنزین بەردەوام دەبێت"
ئومێد خۆشناو گوتی: "لێکەوتەی دیکەی جەنگ نرخی نەوت و گاز و بەنزین بوو ک تاوەکو رادەیەک نرخی ناجێگیر بوو، ئیستا دۆخەکە جێگر بووە و بەرەو ئاساییبوونەوەی زیاتر دەڕوات. ئەوەی لە بازاڕ دەفرۆشرێ، نرخی زیاتر دادەبەزێ. نەوت و بەنزینیش کە نرخی پاڵپشتیکراوی حکومەت دابەش دەکرێ، بەردەوام دەبێت".
لە دوای جەنگەوە لە 28ـی شوبات، لە هەرێمی کوردستان گازی ماڵان کەم بووەتەوە. پارێزگاری هەولێر لەوبارەیەوە گوتی: "پێداویستی رۆژانەی ئێمە رۆژانە 17 تانکەری 20 تۆنی گازە، بەڵام تاوەکو ئەمڕۆ رۆژانە دوو بۆ سێ تانکەرمان بۆ دێت، کە زۆر کەمە".
ئومێد خۆشناو ئاماژەی بەوەکرد: "پێش کەمبوونەوەی گاز دابەشکردنیان کردووە بە کارتی ئەلیکترۆنی کە بۆ نەوت و گاز بەکاردێ و لە داهاتوودا بۆ بەنزینیش بەکار دێت، بەڵام تاوەکو ئێستا کێشەکە چارەسەرنەکراوە".
پارێزگاری هەولێر گوتی، "بەرهەمهێنانی گاز کەمێک باشتر بووە و پێمانگوتراوە بەرەو چارەسەر دەچین، ئومێد دەکەین لە چەند رۆژی داهاتوودا بەسەر ئەو دۆخەشدا زاڵبین".
پارێزگاری هەولێر باسی لەوەکرد، هەوڵ دەدەن بۆ ئەوەی بەشێک گاز بۆ فڕن و نانەواخانەکان دابین بکەن و بۆئەوەی زیانمەند نەبن.
"پارچەی درۆن لە قوتابخانەیەک کەوتووەتە خوارەوە"
لەبارەی کردنەوەی قوتابخانەکانیش ئومێد خۆشناو گوتی، هەرکاتێک وەزارەتەکانی پەروەردە و خوێندنی باڵا بڕیاری کردنەوەی قوتابخانەکان بدەن، ئەوان پێیەوە پابەند دەن.
بە گوتەی پارێزگاری هەولێر، کاتێک بڕیاری داخستنی قوتابخانەکان و خوێندنی بە ئۆنلاین درا، هەندێک کەس رەخنەیان لێگرتووە و پێیان باش نەبووە، بەڵام "بەیانییەکەی چەندین پارچە درۆن لە قوتابخانەیەک کەوتنە خوارەوە".
.jpg&w=3840&q=75)