سەرۆک بارزانی: کاراکردنەوەی پەرلەمان لەدژی هیچ کەس و لایەنێک نییە

رووداو دیجیتاڵ

سەرۆک بارزانی پەیامێکی لەبارەی کاراکردنەوەی پەرلەمانی کوردستان بڵاوکردەوە و دەڵێت، "هەنگاوێکە بە ئاراستەی پاراستن و بەهێزکردنی هەرێمی کوردستان، لە دژی هیچ کەس و لایەنێک نییە و بە دڵنیاییەوە لە خزمەتی بەرژەوەندییە باڵاکانی گەلی کوردستان و پڕۆسەی سیاسیدا دەبێت."

وەکو لە پەیامەکەی سەرۆک بارزانی دا هاتووە، "ئێستا کە پەرلەمان دەستی بە کارەکانی کردووە، داوا لە هەموو ئەو لایەنە بەڕێزانە دەکەم کە بەشداریی ئەو پڕۆسەیە نەبوون، ئەوانیش بەشداریی بکەن و پێکەوە لەپێناو خزمەتکردنی گەلی کوردستان و هەنگاوەکانی تر هاوکار و یارمەتیدەری پڕۆسەی سیاسی بن."

دوای تێپەڕینی دوو ساڵ بەسەر پەککەوتنی پەرلەماندا، دواجار جووڵە لە پەرلەمانی کوردستان دروستبوو و ئەمڕۆ بە ئامادەبوونی 52 پەرلەمانتار پەرلەمان کاراکرایەوە و دەستەی سەرۆکایەتییش هەڵبژێردران.

دەقی پەیامەکەی سەرۆک بارزانی:

بەناوی خودای بەخشندە و میهرەبان

بەبۆنەی کاراکردنەوەی پەرلەمانی هەرێمی کوردستان پیرۆزبایی لە گەلی کوردستان و دەستەی سەرۆکایەتیی پەرلەمان و هەموو لایەنە سیاسییەکان دەکەم.

دوای دوو ساڵ تێپەڕبوون بەسەر هەڵبژاردنی هەرێمی کوردستان خۆشبەختانە توانرا پەرلەمانی کوردستان کارا بکرێتەوە. لێرەدا سوپاسی هەموو ئەو پەرلەمانتارانە دەکەم کە هەڵوێستیان هەبوو و بە ئەرکی یاسایی و نیشتیمانی خۆیان هەستان و ئەم دامەزراوە دەستوورییەی هەرێمیان کارا کردەوە.

کاراکردنەوەی پەرلەمان هەنگاوێکە بە ئاراستەی پاراستن و بەهێزکردنی هەرێمی کوردستان و لە دژی هیچ کەس و لایەنێک نییە و بە دڵنیاییەوە لە خزمەتی بەرژەوەندییە باڵاکانی گەلی کوردستان و پڕۆسەی سیاسیدا دەبێت.

ئێستا کە پەرلەمان دەستی بە کارەکانی کردووە، داوا لە هەموو ئەو لایەنە بەڕێزانە دەکەم کە بەشداریی ئەو پڕۆسەیە نەبوون، ئەوانیش بەشداریی بکەن و پێکەوە لەپێناو خزمەتکردنی گەلی کوردستان و هەنگاوەکانی تر هاوکار و یارمەتیدەری پڕۆسەی سیاسی بن.

مسعود بارزانی
4ی تشرینی دووەمی 2026