رووداو دیجیتاڵ
بەڕێوەبەری راگەیاندنی فڕۆکەخانەی نێودەوڵەتی کەرکووک دەڵێت، گەشتەکانیان بەراورد بە پێش جەنگ زیادی کردووە. ئاماژە بەوەش دەکات، بۆ یەکەم جار گەشتیان بۆ ئێران و هیندستان دەبێت.
هەردی سەمەد، بەڕێوەبەری راگەیاندنی فڕۆکەخانەی کەرکووک، ئەمڕۆ 18-08-2026 بە تۆڕی میدیایی رووداوی گوت: "بەراورد بە پێش جەنگی ناوچەکە، گەشتەکانمان زۆر زیادبوون، بۆ نموونە گەشتی دووبەی، ئازەربایجان و لووبنان پێش جەنگ نەبوون و ئێستا هەن".
پێش جەنگ لە فڕۆکەخانەی کەرکووکەوە گەشتەی ئیستەنبووڵ هەبوو بۆ تورکیا. هەردی سەمەد دەڵێت، گەشتیان بۆ شارەکانی دیکەی تورکیا زیادیکردووە، بۆ نموونە بۆ ئەنتاڵیا و ترابزۆن.
بەڕێوەبەری راگەیاندنی فڕۆکەخانەی کەرکووک ئاماژەی بەوەکرد، "بۆ یەکەم جار هەفتانە گەشتی هیندستانمان بۆ فڕۆکەخانەی نیودەلهی دەبێت و لە ئەمڕۆوە گەشتەکان دەستپێدەکات. هەروەها 30ـی ئەم مانگە گەشتمان بۆ ئێران دەستپێدەکات".
گەورەترین فڕۆکەخانەی باشووری کوردستان فڕۆکەخانەی نێودەوڵەتی هەولێرە، رۆژانە نزیکەی 50 گەشتی چوون و هاتنی بۆ وڵاتانی جیهان هەیە، هەروەها فڕۆکەخانەی نێودەوڵەتی جەلال تاڵەبانی لە سلێمانی رۆژانە نزیکەی 20 گەشتی بۆ نێوخۆ و دەرەوە هەیە.
