رووداو دیجیتاڵ
یوسف کیلابی دەڵێت، "ئەمڕۆ هەموو هێزە سیاسییەکان هەوڵی خێرا پێکهێنانی حکومەتێکی سازان دەدەن، کە دەستبەکار بێت بۆ چارەسەری ئاڵنگارییە سەختەکان، کە پێویستی بە چارەسەری خێرا و بەهێزە."
لە ستایشی نێچیرڤان بارزانی دا، یوسف کیلابی، ئەندامی پەرلەمانی عێراق لە هاوپەیمانیی دەوڵەتی یاسا دەڵێت، "پێمان وایە کە [نێچیرڤان بارزانی] بەوە ناسراوە، شێوازێکی نەرمی هەیە و پێزانین و رێزی زۆری هەیە لە بەغدا." ئەو پەرلەمانتارە پێیشی وایە، "بە تەواوبوونی ئەم سەردانە، هێڵە گەورە و سەرەکییەکانی پێکهێنانی حکومەت دابنرێن."
پەرلەمانتارەکە جەختی لەوە کردەوە کە بە دڵنیاییەوە پێشوازی لە سەردانی نێچیرڤانى بارزانی، سەرۆکی هەرێمی کوردستان دەکەن، "هیوای ئەوە دەخوازین لایەنە سیاسییەکان، بەتایبەت لایەنە کوردستانییەکان، بە رەچاوکردنی بەرژەوەندیی وڵات بەگشتی بڕوانن و ئەمجارە لەبارەی داواکارییەکانەوە پەنا بۆ یاساکانی بودجە، نەوت و گاز ببەین و لەسەر بنەما سەرەکییەکان رێکبکەوین."
کیلابی داوایشی کرد، هەوڵ بدەن لەو رێگەیەوە ئەو ناکۆکییانە چارەسەر بکەن کە ئەگەری روودانیان هەیە، "لەوانە پرسەکانی دارایی، نەوت و گاز، دەروازە سنوورییەکان و سەروەریی یەکگرتووى وڵات، هیوامان وایە کە ئەم پرسانە تاوتوێ بکرێن و بخرێنە سەر مێزی گفتوگۆ و بە یەکجاری یەکلا بکرێنەوە، بەتایبەت لایەنە داراییەکان، نەوت و گاز و دەروازە سنوورییەکان، کە هەمیشە جێی ناکۆکی بوون لەگەڵ بەغدا."
رۆژی دووشەممە، 4ـی ئایاری 2026، نێچیرڤان بارزانی، سەرۆکی هەرێمی کوردستان و جێگری سەرۆکی پارتی دیموکراتی کوردستان، بە سەردانێک گەیشتە بەغدا و لەگەڵ شاندێکی هاوپەیمانیی چوارچێوەی هاوئاهەنگیی شیعەکان کۆبووەوە، بڕیاریشە دواتر لەگەڵ ئەنجوومەنی سیاسیی نیشتمانیی سوننەکان کۆببێتەوە.
لە راگەیێندراوێکی سەرۆکایەتیی هەرێمی کوردستان لەبارەی کۆبوونەوەی نێچیرڤان بارزانی و چوارچێوەی هاوئاهەنگی ئاماژە بەوە کراوە، "سهركردهكانى چوارچێوهى هاوئاهەنگی، وێڕاى دهربڕینی خۆشحاڵى به سهردانهكه، ستايشى ههڵوێست و سياسهتهكانى سهرۆك نێچيرڤان بارزانى و ديد و بۆچوونهكانيان كرد لهپێناو چارهسهركردنى كێشهكان و گرنگيى هاريكاريى هاوبهش."
