لە هەفتەیەکدا 5 هێرش کراونەتە سەر کۆمپانیا بیانییەکان لە بەغدا؛ ترسیان دروستکردووە

عەلا لامی، شایەتحاڵە و دەڵێت، "دووکانەکەم دادەخست، لە ناکاو گوێمان لە دەنگێکی بەهێزی تەقینەوە بوو. دواتر خەڵک و هێزی ئەمنی زۆر کۆبوونەوە و زانیمان بۆمبێک تەقیوەتەوە. بەداخەوە رووداوەکە ترس و دڵەڕاوکێی زۆری خێزانەکانی نزیک لە خواردنگە و بازاڕەکە لێکەوتەوە." 

دوای کەمتر لە 10 خولەک، تەقینەوەیەکی دیکە لە گەڕەکێکی شەقامی فەڵەستین لە رۆژئاوای بەغدا روویدا. پەیمانگەی کامبریجی بەریتانی تێیدا کرایە ئامانج. لەوێش زیانی گیانی و مادی لێنەکەوتەوە. ئەنجامدەرانی هێرشەکەش خۆیان دەرباز کرد. 

عەباس سەلمان شایەتحاڵی هێرشی دووەمە، دەڵێت: "نەمزانی چی روویدا، بەڵام گوتیان بۆمبێک لەنێو باڵەخانەی پەیمانگەکە تەقییەوە. نازانم چۆن روویدا؟ ئایا هێرشکارەکان بە ماتۆڕسکیلێک ئەم هێرشەیان کرد یان بە شێوازێکی دیکە بوو؟ حەرامە، ناتوانم کەس تۆمەتبار بکەم."

بەمەش، لە ماوەی تەنیا هەفتەیەکدا پێنج هێرش کرایە سەر خواردنگە و کۆمپانیا بیانییەکان لە بەغدا. هێزە ئەمنییەکانیش دەڵێن، ئەو کردەوانە ئاژاوەگێڕین و زیان بە ناوبانگی عێراق دەگەیێنن. جەخت لەوەش دەکەنەوە، سزای تووندی هەر کەسێک دەدەن کە ئاسایش و سەقامگیریی کۆمەڵگە و موڵکی گشتیی و تایبەت بکەنە ئامانج. 

لەلایەکی دیکەوە، باڵیۆزخانەی ئەمریکا لە بەغدا، سەرکۆنەی هێرشەکانی کرد و داوای لە حکومەتی عێراق کرد لێکۆڵینەوەیەکی ورد دەستپێبکات و ئەنجامدەرانی لە رێگەی دادگە سزا بدات. باسی لەوەشکرد کە ئەو جۆرە کردەوانە لە توانای عێراق کەمدەکاتەوە بۆ راکێشانی سەرنجی وەبەرهێنەری بیانی.