رووداو دیجیتاڵ
وەزارەتی ناوخۆی عێراق دەستی بە رێکارەکانی خستنەپاڵ و تێکەڵکردنی کارتی زانیاری لەنێو کارتی نیشتمانیدا کرد، بەمەش کارتی نیشتمانی دەبێتە تاکە بەڵگەنامەی بنەڕەتی لە مامەڵە فەرمییەکاندا و پێویستی بە دەرکردنی کارتی زانیاری نامێنێت.
رۆژی یەکشەممە، 22ی تشرینی دووەمی 2026، میقداد میری، بەڕێوەبەری راگەیاندن و پەیوەندییەکانی وەزارەتی ناوخۆی عێراق بە تۆڕی میدیایی رووداوی راگەیاند، کارمەندانی بەڕێوەبەرایەتیی رەگەزنامە و زانیارییە شارستانییەکان دەستیان بە رێکارەکانی نوێکردنەوەی ئەلیکترۆنیی داتاکانی نیشتەجێبوون کردووە، ئەوەش لە رێگەی کردنەوەی بەشی تایبەتمەند لە بەغدا و پارێزگاکان.
بە گوتەی میقداد میری، سیستمە نوێیەکە رێگە بە هاووڵاتییان دەدات لە رێگەی ئەپڵیکەیشنێکی تایبەتی مۆبایلەوە لە رێگەی (ژمارەی نیشتمانی)ی سەر کارتەکەیانەوە دەستیان بە زانیارییەکانی نیشتەجێبوونیان بگات و بە شێوەی ئەلیکترۆنی نوێی بکەنەوە، بەبێ ئەوەی پێویست بکات بەڵگەنامەی نوێ یان کاخەز دەربهێنن، چونکە لە تەواوی دامودەزگاکاندا تەنیا پشتبەستن بە کارتی نیشتمانی دەبێت.
بەڕێوەبەری راگەیاندنی وەزارەتی ناوخۆ ئاماژەی بەوەش کرد، گرنگیی ئەم هەنگاوە تەنیا لە کەمکردنەوەی ژمارەی بەڵگەنامە فەرمییەکاندا نییە، بەڵکو بارگرانیی رۆژانەی سەر شانی هاووڵاتییان کەم دەکاتەوە و پێویستیی سەردانیکردنی بەردەوامی فەرمانگەکانی وەزارەتی ناوخۆ ناهێڵێت، هاوکات دەبێتە هۆی خێراکردنی راییکردنی مامەڵە کارگێڕییەکان لە رێگەی یەک بەڵگەنامەی فەرمییەوە.
باسی لەوە کرد کە ئەم پڕۆژەیە بەشێکە لە هەوڵێکی فراوانتر بۆ نوێکردنەوەی سیستەمی باری شارستانی و گواستنەوەی قۆناخ بە قۆناخ بەرەو پێشکێشکردنی تەواوی خزمەتگوزارییە حکومییەکان بە شێوەی دیجیتاڵی، کە هاوتایە لەگەڵ پلانەکانی حکومەت بۆ پرۆسەی گۆڕانکاریی دیجیتاڵی لە عێراقدا.



