.webp&w=3840&q=75)
رووداو دیجیتاڵ
چوارچێوەی هاوئاهەنگی جەخت لە بەهێزکردنی دامەزراوەکانی دەوڵەت دەکاتەوە؛ ئاماژە بەوەش دەکات، دەبێت تاوەکو نێوەڕاستی ساڵی داهاتوو دۆسیەی چەکی دەرەوەی دەوڵەت بە پێی دەستوور چارەسەر بکرێت.
چوارچێوەی هاوئاهەنگی، رۆژی شەممە، 3ـی تشرینی یەکەمی 2026، لە راگەیێندراوێکدا رایگەیاند: "دەستخۆشی لە هەڵوێستی گرووپەکان دەکەین کە بەرژەوەندیی گشتییان رەچاو کردووە، کە ئەمەش بەرهەمی هەوڵێکی زۆری لایەنە دڵسۆزەکان بووە لە ماوەی رابردوودا."
چوارچێوەی هاوئاهەنگی دەڵێت: "مەرجەعیەتی باڵای ئایینی لە نەجەف سوپای ئارامیی نیشتمانە و رۆڵێکی گەورەی لە پاراستنی عێراقدا هەبووە."
چوارچێوەی هاوئاهەنگی ستایشی هاوپەیمانیی نێودەوڵەتیی کرد بۆ پابەندبوونی بە کشانەوە لە عێراق لەو وادەیەی بۆی دیاریکرابوو.
هاوکات داوای کرد دەوڵەت بەردەوام بێت لە کارەکانی تاوەکو رێککەوتی 30-6-2027، کە وەک وادەی کۆتایی دیاریکراوە بۆ رێکخستنەوەی چەک.
لایەنە شیعەکان جەختیان کردەوە کە حکومەت و دەوڵەتی عێراق توانایەکی زۆریان هەیە بۆ پاراستنی هەموو پێکهاتەکانی وڵات و رەخساندنی ژینگەیەکی ئارام بۆ وەبەرهێنان.
ئەمە لە کاتێکدایە، رۆژی 30ـی ئەیلوول وەک (رۆژی سەروەری) و وادەی کۆتاییهاتنی ئەرکی هاوپەیمانیی نێودەوڵەتی لە عێراق راگەیێندرا.
یەکێک لە گەورەترین ئالنگارییەکانی بەردەم حکومەتەکەی عەلی فالح زەیدی، پرسی چەکی دەستی گرووپە جیاوازەکانە.
